muKHaddaraat-e-giroh-e-muslim hamari haalat mein kya rahi hai

muḳhaddarāt-e-giroh-e-muslim hamārī hālat meñ kyā rahī hai

ye ġhaflat-e-be-panāh tauba ki qaum-e-muslim pe chhā rahī hai

muāshrat ke tarīq bhūle tamaddun-e-ḳhush-salīk bhūle

tamīz-e-qaum-o-farīq bhūle usī kī tahzīb bhā rahī hai

vo tarz-e-aḳhlāq-e-ahamadī bhī vo tasm-e-ādāb-e-hāshmī bhī

vo shaan hī ham se miT ga.ī hamārī hālat batā rahī hai

vo jañg-e-Mu'tah vo jañg-e-ḳhaibar vo harb-e-ḳhālid vo zarb-e-haidar

vo teġh-e-muslim kī shān-e-jauhar ki shān-e-muslim batā rahī hai

magar vo hālat kahāñ hai baaqī vo jāh-o-saulat kahāñ hai baaqī

vo teġh-e-himmat kahāñ hai baaqī ki tāb-o-tāqat kyā rahī hai

vo azm baaqī na razm baaqī na shaukat-o-shān-e-bazm baaqī

hamārī har baat miT chukī hai ki ham ko qismat miTā rahī hai

ḳharāb hālat huī yahāñ tak taġhāful-e-be-mahal kahāñ tak

ki shāh-rāh-e-amal pe duniyā qadam barābar uThā rahī hai

ḳhudā ye din bhī guzār degā vo 'sayyada' phir qarār degā

hamārī hālat sañvār degā ki kis kī bigḌī sadā rahī hai

muKHaddaraat-e-giroh-e-muslim hamari haalat mein kya rahi hai

ye ghaflat-e-be-panah tauba ki qaum-e-muslim pe chha rahi hai

muashrat ke tariq bhule tamaddun-e-KHush-salik bhule

tamiz-e-qaum-o-fariq bhule usi ki tahzib bha rahi hai

wo tarz-e-aKHlaq-e-ahamadi bhi wo tasm-e-adab-e-hashmi bhi

wo shan hi hum se miT gai hamari haalat bata rahi hai

wo jang-e-Mu'tah wo jang-e-KHaibar wo harb-e-KHalid wo zarb-e-haidar

wo tegh-e-muslim ki shan-e-jauhar ki shan-e-muslim bata rahi hai

magar wo haalat kahan hai baqi wo jah-o-saulat kahan hai baqi

wo tegh-e-himmat kahan hai baqi ki tab-o-taqat kya rahi hai

wo azm baqi na razm baqi na shaukat-o-shan-e-bazm baqi

hamari har baat miT chuki hai ki hum ko qismat miTa rahi hai

KHarab haalat hui yahan tak taghaful-e-be-mahal kahan tak

ki shah-rah-e-amal pe duniya qadam barabar uTha rahi hai

KHuda ye din bhi guzar dega wo 'sayyada' phir qarar dega

hamari haalat sanwar dega ki kis ki bigDi sada rahi hai