مخدرات گروہ مسلم ہماری حالت میں کیا رہی ہے

مخدرات گروہ مسلم ہماری حالت میں کیا رہی ہے

یہ غفلت بے پناہ توبہ کہ قوم مسلم پہ چھا رہی ہے

معاشرت کے طریق بھولے تمدن خوش سلیق بھولے

تمیز قوم و فریق بھولے اسی کی تہذیب بھا رہی ہے

وہ طرز اخلاق احمدؐی بھی وہ رسم آداب ہاشمی بھی

وہ شان ہی ہم سے مٹ گئی ہماری حالت بتا رہی ہے

وہ جنگ موتہ وہ جنگ خیبر وہ حرب خالد وہ ضرب حیدر

وہ تیغ مسلم کی شان جوہر کہ شان مسلم بتا رہی ہے

مگر وہ حالت کہاں ہے باقی وہ جاہ و صولت کہاں ہے باقی

وہ تیغ ہمت کہاں ہے باقی کہ تاب و طاقت کیا رہی ہے

وہ عزم باقی نہ رزم باقی نہ شوکت و شان بزم باقی

ہماری ہر بات مٹ چکی ہے کہ ہم کو قسمت مٹا رہی ہے

خراب حالت ہوئی یہاں تک تغافل بے محل کہاں تک

کہ شاہ راہ عمل پہ دنیا قدم برابر اٹھا رہی ہے

خدا یہ دن بھی گزار دے گا وہ سیدہؔ پھر قرار دے گا

ہماری حالت سنوار دے گا کہ کس کی بگڑی سدا رہی ہے