shikasta-pa hun sharik apne karwan mein nahin

shikasta-pā huuñ sharīk apne kārvāñ meñ nahīñ

mere nasīb kī gardish bhī āsmāñ meñ nahīñ

yahī to quvvat-e-tahqīq bāġhbāñ meñ nahīñ

kahāñ ga.iiñ vo bahāreñ jo bostāñ meñ nahīñ

havās jam.a nahīñ rabt jism-o-jāñ meñ nahīñ

jo chāhtā huuñ vo tartīb kārvāñ meñ nahīñ

har ek dil ko hai dushvār ma.arifat merī

vo raaz huuñ jo abhī zehn-e-rāz-dāñ meñ nahīñ

muhīt-e-ġhalba-e-vahdat hai fitrat-e-insāñ

samajh rahā hai ki mujh sā jahāñ meñ nahīñ

uchhāle detī hai ġhammāzī-e-nigāh mujhe

maiñ raaz ban ke bhī qābū-e-rāz-dāñ meñ nahīñ

qafas kī qaid se chhūTe bure zamāne meñ

hamāre vaqt kā tinkā bhī āshiyāñ meñ nahīñ

ta.alluqāt kā ronā hai yaad kī fariyād

ye jāntā huuñ ki maiñ zehn-e-nauha-ḳhvāñ meñ nahīñ

vahāñ subūt mohabbat kā dene aayā huuñ

jahāñ sharīk farishte bhī imtihāñ meñ nahīñ

ḳhudā kā shukr adā kar rahā huuñ ġhurbat meñ

ki mare paañv meñ kāñTe sahī zabāñ meñ nahīñ

maiñ chāhtā huuñ ki manzil hī muñh se bol uThe

fazā-shanās koī mire kārvāñ meñ nahīñ

jahāñ meñ ishq kī miTTī ḳharāb hai 'sīmāb'

zamīñ tañg hai gunjā.ish āsmāñ meñ nahīñ

shikasta-pa hun sharik apne karwan mein nahin

mere nasib ki gardish bhi aasman mein nahin

yahi to quwwat-e-tahqiq baghban mein nahin

kahan gain wo bahaaren jo bostan mein nahin

hawas jama nahin rabt jism-o-jaan mein nahin

jo chahta hun wo tartib karwan mein nahin

har ek dil ko hai dushwar marifat meri

wo raaz hun jo abhi zehn-e-raaz-dan mein nahin

muhit-e-ghalba-e-wahdat hai fitrat-e-insan

samajh raha hai ki mujh sa jahan mein nahin

uchhaale deti hai ghammazi-e-nigah mujhe

main raaz ban ke bhi qabu-e-raaz-dan mein nahin

qafas ki qaid se chhuTe bure zamane mein

hamare waqt ka tinka bhi aashiyan mein nahin

talluqat ka rona hai yaad ki fariyaad

ye jaanta hun ki main zehn-e-nauha-KHwan mein nahin

wahan subut mohabbat ka dene aaya hun

jahan sharik farishte bhi imtihan mein nahin

KHuda ka shukr ada kar raha hun ghurbat mein

ki mare panw mein kanTe sahi zaban mein nahin

main chahta hun ki manzil hi munh se bol uThe

faza-shanas koi mere karwan mein nahin

jahan mein ishq ki miTTi KHarab hai 'simab'

zamin tang hai gunjaish aasman mein nahin