main hun jahan wahan hai nazar ka guzar kahan

maiñ huuñ jahāñ vahāñ hai nazar kā guzar kahāñ

hai ismat-e-jamāl ko tāb-e-nazar kahāñ

manzūr hai abhī unheñ pās-e-nazar kahāñ

va.ada kiyā hai jalva-garī kā magar kahāñ

thī shorish-e-bahār meñ itnī ḳhabar kahāñ

kyā jaane maiñ ne pheñk diye bāl-o-par kahāñ

manzil par munhasir hai musāfir tirā sukūñ

rakhī hai ye matā.a sar-e-rah-guzar kahāñ

māh-o-nujūm se bhī pare mahv-e-sair huuñ

dekhā hai tuune merā maqām-e-nazar kahāñ

zinda-dilān-e-ishq-o-fanā rāz-o-hasat buud

ye mulk-e-jāvedāñ ke musāfir idhar kahāñ

ujḌā aur aisī shaan se ujḌā mirā chaman

ye bhī pata nahīñ ki banāyā thā ghar kahāñ

ġhārat hotī to haiñ mirī bedāriyāñ kahīñ

maiñ jahāñ ḳhvāb se thā peshtar kahāñ

pahuñchā huuñ rāh-e-dūr se hastī kī shaam tak

ab ġhaur kar rahā huuñ ki hogī sahar kahāñ

apne junūn-e-ḳhām kī takmīl kījiye

'sīmāb' phir ye mausam-e-dīvāna-gar kahāñ

main hun jahan wahan hai nazar ka guzar kahan

hai ismat-e-jamal ko tab-e-nazar kahan

manzur hai abhi unhen pas-e-nazar kahan

wada kiya hai jalwa-gari ka magar kahan

thi shorish-e-bahaar mein itni KHabar kahan

kya jaane main ne phenk diye baal-o-par kahan

manzil par munhasir hai musafir tera sukun

rakhi hai ye mataa sar-e-rah-guzar kahan

mah-o-nujum se bhi pare mahw-e-sair hun

dekha hai tune mera maqam-e-nazar kahan

zinda-dilan-e-ishq-o-fana raaz-o-hasat bud

ye mulk-e-jawedan ke musafir idhar kahan

ujDa aur aisi shan se ujDa mera chaman

ye bhi pata nahin ki banaya tha ghar kahan

ghaarat hoti to hain meri bedariyan kahin

main jahan KHwab se tha peshtar kahan

pahuncha hun rah-e-dur se hasti ki sham tak

ab ghaur kar raha hun ki hogi sahar kahan

apne junun-e-KHam ki takmil kijiye

'simab' phir ye mausam-e-diwana-gar kahan