ye KHushi uski jo milna use manzur nahin

ye ḳhushī us kī jo milnā use manzūr nahīñ

rag-e-jāñ duur hai insāñ se vo duur nahīñ

aur hī jalve halākat ke liye kyā kam haiñ

na ho be-parda ik jalva-e-mastūr nahīñ

jabr se tere aqīdat ho to ye baat hai aur

varna insāñ kisī haal meñ majbūr nahīñ

ai muqaddar evaz-e-ishq na de tāj-e-shahī

are maiñ to kah rahā huuñ mujhe manzūr nahīñ

merī nāzish meñ bhī terī hī ḳhudī hai mahfūz

ai mere dost maiñ ḳhuddār huuñ maġhrūr nahīñ

unheñ mānūs-e-vafā aaj maiñ kar luuñ lekin

husn ko ishq banānā mujhe manzūr nahīñ

ḳhatm kyuuñ silsila-e-dār-o-rasan ho 'sīmāb'

ham to baaqī haiñ agar shiblī-o-mansūr nahīñ

ye KHushi us ki jo milna use manzur nahin

rag-e-jaan dur hai insan se wo dur nahin

aur hi jalwe halakat ke liye kya kam hain

na ho be-parda ek jalwa-e-mastur nahin

jabr se tere aqidat ho to ye baat hai aur

warna insan kisi haal mein majbur nahin

ai muqaddar ewaz-e-ishq na de taj-e-shahi

are main to kah raha hun mujhe manzur nahin

meri nazish mein bhi teri hi KHudi hai mahfuz

ai mere dost main KHuddar hun maghrur nahin

unhen manus-e-wafa aaj main kar lun lekin

husn ko ishq banana mujhe manzur nahin

KHatm kyun silsila-e-dar-o-rasan ho 'simab'

hum to baqi hain agar shibli-o-mansur nahin