wo tanhai ho ya mahfil ho taskin dil ki mushkil hai

vo tanhā.ī ho yā mahfil ho taskīñ dil kī mushkil hai

banā letā hai ḳhud apne liye jalve ye vo dil hai

hai bātil mahfil-e-ālam to phir mushkil hī mushkil hai

mirī nazreñ bhī bātil haiñ tirā jalva bhī bātil hai

vahāñ huuñ maiñ jahāñ tam.īz-e-husn-o-ishq mushkil hai

har ik jalva ab āġhosh-e-nazar meñ jalva-e-dil hai

kamāl-e-ilm-o-tahqīq-e-mukammal kā ye hāsil hai

tirā idrāk mushkil thā tirā idrāk mushkil hai

ye vīrānī tasavvur kī vo rañgīnī ḳhayāloñ kī

kabhī mahfil meñ ḳhalvat hai kabhī ḳhalvat meñ mahfil hai

ġhalat samjhā jo tū mahdūd samjhā rāh-e-hastī ko

jahāñ hotī hai manzil ḳhatm vo āġhāz-e-manzil hai

junūñ kā haath dāman se na pahuñchā parda-e-dil tak

abhī baaqī vahī pābandī-e-ādāb-e-mahmil hai

ba-qadr-e-zarf-o-himmat sahl-o-mushkil hai rah-e-ulfat

yahāñ sāhil bhī dariyā hai yahāñ dariyā bhī sāhil hai

uḌā kar dhajjiyāñ pairāhan-e-hastī kī ḳhush thā maiñ

nidā aa.ī ye dīvāne junūñ kī pahlī manzil hai

huī ma.alūm vaj.h-e-iztirāb-o-shorish-e-ālam

yahāñ dil hai har ik zarra har ik zarra meñ ik dil hai

maiñ ġhāfil ho ke dānista ḳharāb-e-bazm-e-hastī huuñ

samajhtā huuñ ki ye mahfil nahīñ hai ḳhvāb-e-mahfil hai

vo ā.īna ho yā ho phuul taara ho ki paimāna

kahīñ jo kuchh bhī TuuTā maiñ yahī samjhā mirā dil hai

na chheḌ ai naġhma-gar taskīn-e-be-hañgāma ke naġhme

fazāoñ meñ abhī gunjā.ish-e-shor-e-salāsil hai

ujālā ho to DhūñDūñ dil bhī parvānoñ kī lāshoñ meñ

mirī barbādiyoñ ko intizār-e-sub.h-e-mahfil hai

ilāhī ġhaflat-e-ālam ko rañg-e-hoshiyārī de

ki tū ġhāfil nahīñ duniyā se duniyā tujh se ġhāfil hai

vo dil le kar hameñ be-dil na samjheñ un se kah denā

jo haiñ maare hue nazroñ ke un kī har nazar dil hai

vo ai 'sīmāb' kyuuñ sar-gashta-e-tasnīm-o-jannat ho

mayassar jis ko sair-e-tāj aur jamunā kā sāhil hai

wo tanhai ho ya mahfil ho taskin dil ki mushkil hai

bana leta hai KHud apne liye jalwe ye wo dil hai

hai baatil mahfil-e-alam to phir mushkil hi mushkil hai

meri nazren bhi baatil hain tera jalwa bhi baatil hai

wahan hun main jahan tamiz-e-husn-o-ishq mushkil hai

har ek jalwa ab aaghosh-e-nazar mein jalwa-e-dil hai

kamal-e-ilm-o-tahqiq-e-mukammal ka ye hasil hai

tera idrak mushkil tha tera idrak mushkil hai

ye virani tasawwur ki wo rangini KHayalon ki

kabhi mahfil mein KHalwat hai kabhi KHalwat mein mahfil hai

ghalat samjha jo tu mahdud samjha rah-e-hasti ko

jahan hoti hai manzil KHatm wo aaghaz-e-manzil hai

junun ka hath daman se na pahuncha parda-e-dil tak

abhi baqi wahi pabandi-e-adab-e-mahmil hai

ba-qadr-e-zarf-o-himmat sahl-o-mushkil hai rah-e-ulfat

yahan sahil bhi dariya hai yahan dariya bhi sahil hai

uDa kar dhajjiyan pairahan-e-hasti ki KHush tha main

nida aai ye diwane junun ki pahli manzil hai

hui malum wajh-e-iztirab-o-shorish-e-alam

yahan dil hai har ek zarra har ek zarra mein ek dil hai

main ghafil ho ke danista KHarab-e-bazm-e-hasti hun

samajhta hun ki ye mahfil nahin hai KHwab-e-mahfil hai

wo aaina ho ya ho phul tara ho ki paimana

kahin jo kuchh bhi TuTa main yahi samjha mera dil hai

na chheD ai naghma-gar taskin-e-be-hangama ke naghme

fazaon mein abhi gunjaish-e-shor-e-salasil hai

ujala ho to DhunDun dil bhi parwanon ki lashon mein

meri barbaadiyon ko intizar-e-subh-e-mahfil hai

ilahi ghaflat-e-alam ko rang-e-hoshiyari de

ki tu ghafil nahin duniya se duniya tujh se ghafil hai

wo dil le kar hamein be-dil na samjhen un se kah dena

jo hain mare hue nazron ke un ki har nazar dil hai

wo ai 'simab' kyun sar-gashta-e-tasnim-o-jannat ho

mayassar jis ko sair-e-taj aur jamuna ka sahil hai