muKHtalif hayulon mein ek meri tamanna thi

muḳhtalif hayūloñ meñ ik mirī tamannā thī

chhup ga.ī to uqbā thī mil ga.ī to duniyā thī

kuchh ajab mohabbat meñ nīyyat-e-tamāshā thī

ik nazar meñ jalve the ik nazar meñ duniyā thī

dīda-zeb thī duniyā qābil-e-tamāshā thī

dil agar na mar jaatā zindagī burī kyā thī

shab-sitān-e-ālam meñ sham.a ban ke aayā thā

mujh ko sirf utnī hī fursat-e-tamāshā thī

sau tarah taḳhayyul kī karvaTeñ badalnī thiiñ

the fareb fitrat ke diin thā na duniyā thī

avval avval ik muusā mā.il-e-tamāshā the

rafta rafta hastī kī har uThān muusā thī

har shafaq kī maujoñ meñ the ġhurūb sau aalam

har sahar ke parde meñ ik jadīd duniyā thī

fitrat-e-talab ma.alūm haañ magar ye dekhā hai

jis ne chhoḌ dī duniyā us ke saath duniyā thī

jāda-e-tavakkul bhī ik ajiib jaada thā

maiñ jidhar bhī jaatā thā Thokaroñ meñ duniyā thī

tū havas meñ duniyā kī zindagī miTā baiThā

bhuul ho ga.ī ġhāfil zindagī hī duniyā thī

maiñ jiyā bhī duniyā meñ aur jaan bhī de dī

ye na khul sakā lekin aap kī ḳhushī kyā thī

bhiik chhup-chhupā kar dī kyuuñ na apne jalvoñ kī

māñgne ko muusā the dekhne ko duniyā thī

maiñ fareb-e-sūrat meñ be-niyāz-e-ma.anī thā

merī zindagī 'sīmāb' ik hasīn dhokā thī

muKHtalif hayulon mein ek meri tamanna thi

chhup gai to uqba thi mil gai to duniya thi

kuchh ajab mohabbat mein niyyat-e-tamasha thi

ek nazar mein jalwe the ek nazar mein duniya thi

dida-zeb thi duniya qabil-e-tamasha thi

dil agar na mar jata zindagi buri kya thi

shab-sitan-e-alam mein shama ban ke aaya tha

mujh ko sirf utni hi fursat-e-tamasha thi

sau tarah taKHayyul ki karwaTen badalni thin

the fareb fitrat ke din tha na duniya thi

awwal awwal ek musa mail-e-tamasha the

rafta rafta hasti ki har uThan musa thi

har shafaq ki maujon mein the ghurub sau aalam

har sahar ke parde mein ek jadid duniya thi

fitrat-e-talab malum han magar ye dekha hai

jis ne chhoD di duniya us ke sath duniya thi

jada-e-tawakkul bhi ek ajib jada tha

main jidhar bhi jata tha Thokaron mein duniya thi

tu hawas mein duniya ki zindagi miTa baiTha

bhul ho gai ghafil zindagi hi duniya thi

main jiya bhi duniya mein aur jaan bhi de di

ye na khul saka lekin aap ki KHushi kya thi

bhik chhup-chhupa kar di kyun na apne jalwon ki

mangne ko musa the dekhne ko duniya thi

main fareb-e-surat mein be-niyaz-e-mani tha

meri zindagi 'simab' ek hasin dhoka thi