shab-e-wasl apne nigahban hue hain

shab-e-vasl apne nigahbāñ hue haiñ

pareshāñ kyā hai pareshāñ hue haiñ

mare aage ġhairoñ se paimāñ hue haiñ

ye kam aap ke mujh par ehsāñ hue haiñ

samā.e haiñ apne nigāhoñ meñ aise

jab ā.īna dekhā hai hairāñ hue haiñ

farishtoñ meñ bhī shaiḳh sāhib kī gintī

ye rindoñ kī sohbat meñ insāñ hue haiñ

shab-e-vasl kyā jaane kitnī baḌī thī

bahut un ke gesū pareshāñ hue haiñ

kahāñ maiñ ne luuTī ma.āsī kī lazzat

vo kuchh bhī nahīñ haiñ jo isyāñ hue haiñ

kyā yuuñ judā gosht nāḳhun se us ne

ki dil se judā dil ke armāñ hue haiñ

mirā dam ulajhtā hai ai dast-e-vahshat

mujhe phāñsī tār-e-garebāñ hue haiñ

kuchh āvāzeñ aatī haiñ sunsān shab meñ

ab un se bhī ḳhālī bayābāñ hue haiñ

baḌī gahirī chhantī thī nādān dil se

baḌe yaar ġhārān ke paikāñ hue haiñ

machī hai baḌī dhuum ahal-e-haram meñ

'riyāz' aaj shāyad musalmāñ hue haiñ

shab-e-wasl apne nigahban hue hain

pareshan kya hai pareshan hue hain

mare aage ghairon se paiman hue hain

ye kam aap ke mujh par ehsan hue hain

samae hain apne nigahon mein aise

jab aaina dekha hai hairan hue hain

farishton mein bhi shaiKH sahib ki ginti

ye rindon ki sohbat mein insan hue hain

shab-e-wasl kya jaane kitni baDi thi

bahut un ke gesu pareshan hue hain

kahan main ne luTi maasi ki lazzat

wo kuchh bhi nahin hain jo isyan hue hain

kya yun juda gosht naKHun se us ne

ki dil se juda dil ke arman hue hain

mera dam ulajhta hai ai dast-e-wahshat

mujhe phansi tar-e-gareban hue hain

kuchh aawazen aati hain sunsan shab mein

ab un se bhi KHali bayaban hue hain

baDi gahiri chhanti thi nadan dil se

baDe yar ghaaran ke paikan hue hain

machi hai baDi dhum ahal-e-haram mein

'riyaz' aaj shayad musalman hue hain