hum rote-rote mar gae un ko KHabar nahin

ham rote-rote mar ga.e un ko ḳhabar nahīñ

aaheñ bhī dhul ga.iiñ kahīñ rañg-e-asar nahīñ

mushkil hai sahl mulk-e-adam kā safar nahīñ

hai raah haul-nāk koī rāhbar nahīñ

jo shar-pasand aadmī hai vo bashar nahīñ

vo hai bashar ki jis kī tabī.at meñ shar nahīñ

ai ishq kyā huā tirā surmāya-e-ġhurūr

nāloñ meñ dard aah meñ rañg-e-asar nahīñ

dekhā kabhī na muḌ ke guloñ ne tirī taraf

itnā bhī terī aahoñ meñ bulbul asar nahīñ

naala vo kyā jo dil ko kisī ke hilā na de

vo bhī hai koī aah ki jis meñ asar nahīñ

'akbar' chalo madīna-e-mahbūb kī taraf

is se ziyāda pāk-o-moqaddas safar nahīñ

hum rote-rote mar gae un ko KHabar nahin

aahen bhi dhul gain kahin rang-e-asar nahin

mushkil hai sahl mulk-e-adam ka safar nahin

hai rah haul-nak koi rahbar nahin

jo shar-pasand aadmi hai wo bashar nahin

wo hai bashar ki jis ki tabiat mein shar nahin

ai ishq kya hua tera surmaya-e-ghurur

nalon mein dard aah mein rang-e-asar nahin

dekha kabhi na muD ke gulon ne teri taraf

itna bhi teri aahon mein bulbul asar nahin

nala wo kya jo dil ko kisi ke hila na de

wo bhi hai koi aah ki jis mein asar nahin

'akbar' chalo madina-e-mahbub ki taraf

is se ziyaada pak-o-moqaddas safar nahin