ہم روتے روتے مر گئے ان کو خبر نہیں

ہم روتے روتے مر گئے ان کو خبر نہیں

آہیں بھی دھل گئیں کہیں رنگ اثر نہیں

مشکل ہے سہل ملک عدم کا سفر نہیں

ہے راہ ہولناک کوئی راہبر نہیں

جو شر پسند آدمی ہے وہ بشر نہیں

وہ ہے بشر کہ جس کی طبیعت میں شر نہیں

اے عشق کیا ہوا ترا سرمایۂ غرور

نالوں میں درد آہ میں رنگ اثر نہیں

دیکھا کبھی نہ مڑ کے گلوں نے تری طرف

اتنا بھی تیری آہوں میں بلبل اثر نہیں

نالہ وہ کیا جو دل کو کسی کے ہلا نہ دے

وہ بھی ہے کوئی آہ کہ جس میں اثر نہیں

اکبرؔ چلو مدینۂ محبوب کی طرف

اس سے زیادہ پاک و مقدس سفر نہیں