kis kis ki nazar mein meri jaan aap nahin hain

kis kis kī nazar meñ mirī jaañ aap nahīñ haiñ

kyā aap ye farmāte haiñ ham parda-nashīñ haiñ

āñkhoñ hī kā parda hai magar duurī hai kitnī

ham ḳhāk-nashīñ ho ga.e vo a'rsh-nashīñ haiñ

chāTā kareñ aflāk ke tāroñ ko farishte

vo mālik-e-kaunain haiñ jo ḳhāk-nashīñ haiñ

ye jalva-e-dīdār ne behosh kiyā hai

mahfil meñ tirī yuuñ haiñ ki mahfil meñ nahīñ haiñ

haq to ye hai achchhoñ se jahāñ ho gayā ḳhālī

duniyā meñ ab allāh ke bande bhī nahīñ haiñ

dekhā terī āñkhoñ ko to kho.e ga.e aise

ab tak na pata is kā lagā ham bhī kahīñ haiñ

dekhe bhī koī ġhaur se āñḳheñ bhī hoñ 'akbar'

allāh to ḳhud kahtā hai ham tujh se qarīñ haiñ

kis kis ki nazar mein meri jaan aap nahin hain

kya aap ye farmate hain hum parda-nashin hain

aankhon hi ka parda hai magar duri hai kitni

hum KHak-nashin ho gae wo a'rsh-nashin hain

chaTa karen aflak ke taron ko farishte

wo malik-e-kaunain hain jo KHak-nashin hain

ye jalwa-e-didar ne behosh kiya hai

mahfil mein teri yun hain ki mahfil mein nahin hain

haq to ye hai achchhon se jahan ho gaya KHali

duniya mein ab allah ke bande bhi nahin hain

dekha teri aankhon ko to khoe gae aise

ab tak na pata is ka laga hum bhi kahin hain

dekhe bhi koi ghaur se aanKHen bhi hon 'akbar'

allah to KHud kahta hai hum tujh se qarin hain