kisi par phir ye dil aaya hua hai

kisī par phir ye dil aayā huā hai

mere qaabū se ab niklā huā hai

tirī zulfoñ meñ dil uljhā huā hai

balā ke pech meñ aayā huā hai

safā.ī hai tire aariz kī aisī

ki ā.īna ko bhī saktā huā hai

butoñ par rahtī hai maa.il hamesha

tabī.at ko ḳhudāyā kyā huā hai

chale duniyā se jis kī yaad meñ ham

ġhazab hai vo hameñ bhūlā huā hai

vafā ho yā jafā donoñ se ḳhush haiñ

kareñ kyā ab to dil aayā huā hai

habāb us kā banegā charkH-e-akHzar

yahī qatra to ab dariyā huā hai

ġhazab hai terā bholā-pan mirī jaañ

usī kā ik jahāñ maarā huā hai

sabā phir gesuoñ se tere uljhī

bahār aa.ī use saudā huā hai

chalā zāhid pe fasl-e-gul kā jaadū

mirā yaar āj-kal bahkā huā hai

kamī karne lage aañsū hamāre

ye dariyā ab bahut utrā huā hai

phir us kūcha kī jānib le chalā dil

nahīñ ma.alūm us ko kyā huā hai

pareshān rahte ho din raat 'akbar'

ye kis kī zulf kā saudā huā hai

kisi par phir ye dil aaya hua hai

mere qabu se ab nikla hua hai

teri zulfon mein dil uljha hua hai

bala ke pech mein aaya hua hai

safai hai tere aariz ki aisi

ki aaina ko bhi sakta hua hai

buton par rahti hai mail hamesha

tabiat ko KHudaya kya hua hai

chale duniya se jis ki yaad mein hum

ghazab hai wo hamein bhula hua hai

wafa ho ya jafa donon se KHush hain

karen kya ab to dil aaya hua hai

habab us ka banega charkH-e-akHzar

yahi qatra to ab dariya hua hai

ghazab hai tera bhola-pan meri jaan

usi ka ek jahan mara hua hai

saba phir gesuon se tere uljhi

bahaar aai use sauda hua hai

chala zahid pe fasl-e-gul ka jadu

mera yar aaj-kal bahka hua hai

kami karne lage aansu hamare

ye dariya ab bahut utra hua hai

phir us kucha ki jaanib le chala dil

nahin malum us ko kya hua hai

pareshan rahte ho din raat 'akbar'

ye kis ki zulf ka sauda hua hai