kyun un mein nazar ban ke samaya nahin jata

kyuuñ un meñ nazar ban ke samāyā nahīñ jaatā

tum nuur ho aur āñkhoñ meñ aayā nahīñ jaatā

ġhairoñ se to kyā dard-e-mohabbat kā bayāñ ho

ye haal to apnoñ ko sunāyā nahīñ jaatā

sūrat-gar-e-avval ne kahā dekh kar us ko

is husn kā insān banāyā nahīñ jaatā

allāh re bīmār-e-mohabbat kā tire zo.af

ab hosh meñ bhī aap se aayā nahīñ jaatā

koī mire sahrā meñ qadam rakh nahīñ saktā

majnūñ se bhī is dasht meñ aayā nahīñ jaatā

dāmān-e-kafan chehre pe yuuñ Daal liyā hai

muñh yāroñ ko is vaqt dikhāyā nahīñ jaatā

ruḳhsār jo haiñ surḳh to ruḳh par hai pasīna

rañgat kā bhī bojh un se uThāyā nahīñ jaatā

ab bhī shab-e-va.ada kī tarah uzr-e-hinā hai

ham marte haiñ aur aap se aayā nahīñ jaatā

dam toḌtā huuñ maiñ tumheñ jaane kī paḌī hai

is vaqt to ye naaz uThāyā nahīñ jaatā

but ban ga.e ham chal gayā jaadū ye butoñ kā

but-ḳhāna se ab ka.aba ko jaayā nahīñ jaatā

'akbar' chalo sar ḳhanjar-e-qātil pe chaḌhā deñ

ab zo.af se ye baar uThāyā nahīñ jaatā

kyun un mein nazar ban ke samaya nahin jata

tum nur ho aur aankhon mein aaya nahin jata

ghairon se to kya dard-e-mohabbat ka bayan ho

ye haal to apnon ko sunaya nahin jata

surat-gar-e-awwal ne kaha dekh kar us ko

is husn ka insan banaya nahin jata

allah re bimar-e-mohabbat ka tere zoaf

ab hosh mein bhi aap se aaya nahin jata

koi mere sahra mein qadam rakh nahin sakta

majnun se bhi is dasht mein aaya nahin jata

daman-e-kafan chehre pe yun Dal liya hai

munh yaron ko is waqt dikhaya nahin jata

ruKHsar jo hain surKH to ruKH par hai pasina

rangat ka bhi bojh un se uThaya nahin jata

ab bhi shab-e-wada ki tarah uzr-e-hina hai

hum marte hain aur aap se aaya nahin jata

dam toDta hun main tumhein jaane ki paDi hai

is waqt to ye naz uThaya nahin jata

but ban gae hum chal gaya jadu ye buton ka

but-KHana se ab kaba ko jaya nahin jata

'akbar' chalo sar KHanjar-e-qatil pe chaDha den

ab zoaf se ye bar uThaya nahin jata