au aafat-e-jaan teri nazar aur hi kuchh hai

au āfat-e-jāñ terī nazar aur hī kuchh hai

in tirchhī nigāhoñ kā asar aur hī kuchh hai

ye qalb jo aatā hai nazar aur hī kuchh hai

dil jis se ġharaz hai vo magar aur hī kuchh hai

zāhir meñ to ye ḳhāk-basar aur hī kuchh hai

insān haqīqat meñ magar aur hī kuchh hai

badnām kiyā sohbat-e-aġhyār ne āḳhir

ab aap kī logoñ meñ ḳhabar aur hī kuchh hai

aaj aap kī haiñ aur hī jānib ko nigāheñ

ham dekh rahe haiñ ye nazar aur hī kuchh hai

ka.abe ke bhī dar par ragaḌ aa.e haiñ jabīñ ham

us qibla-e-qaunain kā dar aur hī kuchh hai

marnā bhī koī shai hai jo ḳhauf us se kareñ ham

haañ ai shab-e-furqat tirā Dar aur hī kuchh hai

aane se tumhārī huī raunaq mere ghar kī

dīvāreñ haiñ kuchh aur to dar aur hī kuchh hai

jis din se gale meñ hai tire motiyoñ kā haar

us roz se bāzār-e-guhar aur hī kuchh hai

paidā huā insān to kuchh aur hī shai thā

ab hālat-e-hañgām-e-safar aur hī kuchh hai

aaj aate haiñ vo aap ke ghar kī taraf 'akbar'

kuchh tum ko ḳhabar bhī hai ḳhabar aur hī kuchh hai

au aafat-e-jaan teri nazar aur hi kuchh hai

in tirchhi nigahon ka asar aur hi kuchh hai

ye qalb jo aata hai nazar aur hi kuchh hai

dil jis se gharaz hai wo magar aur hi kuchh hai

zahir mein to ye KHak-basar aur hi kuchh hai

insan haqiqat mein magar aur hi kuchh hai

badnam kiya sohbat-e-aghyar ne aaKHir

ab aap ki logon mein KHabar aur hi kuchh hai

aaj aap ki hain aur hi jaanib ko nigahen

hum dekh rahe hain ye nazar aur hi kuchh hai

kabe ke bhi dar par ragaD aae hain jabin hum

us qibla-e-qaunain ka dar aur hi kuchh hai

marna bhi koi shai hai jo KHauf us se karen hum

han ai shab-e-furqat tera Dar aur hi kuchh hai

aane se tumhaari hui raunaq mere ghar ki

diwaren hain kuchh aur to dar aur hi kuchh hai

jis din se gale mein hai tere motiyon ka haar

us roz se bazar-e-guhar aur hi kuchh hai

paida hua insan to kuchh aur hi shai tha

ab haalat-e-hangam-e-safar aur hi kuchh hai

aaj aate hain wo aap ke ghar ki taraf 'akbar'

kuchh tum ko KHabar bhi hai KHabar aur hi kuchh hai