phiri hai nazar humse jaani tumhaari

phirī hai nazar ham se jaanī tumhārī

raqīboñ pe hai mehrbānī tumhārī

falak ko bhī bhūlī huiiñ haiñ jafā.eñ

sitam kar rahī hai javānī tumhārī

hai bahzād ḳhud ek hairat kā putlā

khiñche kis se tasvīr jaanī tumhārī

ba-rañg-e-hinā piis Daalā hai ham ko

ġhazab hai ye uThtī javānī tumhārī

na badleñge mohr-e-sulaimāñ se is ko

ye chhallā hai ai jaañ nishānī tumhārī

mere saf.ha-e-dil pe jo khiñch ga.ī hai

vo tasvīr hai ek jaanī tumhārī

sitam pīr-e-gardūñ ke kis se uTheñge

salāmat rahe ye javānī tumhārī

uḌā le ga.ī dil ko pahlū se mere

adāvat huī mehmānī tumhārī

hasīnoñ ko karte ho tasḳhīr 'akbar'

hai e.ajāz-e-jādū-bayānī tumhārī

phiri hai nazar hum se jaani tumhaari

raqibon pe hai mehrbani tumhaari

falak ko bhi bhuli huin hain jafaen

sitam kar rahi hai jawani tumhaari

hai bahzad KHud ek hairat ka putla

khinche kis se taswir jaani tumhaari

ba-rang-e-hina pis Dala hai hum ko

ghazab hai ye uThti jawani tumhaari

na badlenge mohr-e-sulaiman se is ko

ye chhalla hai ai jaan nishani tumhaari

mere safha-e-dil pe jo khinch gai hai

wo taswir hai ek jaani tumhaari

sitam pir-e-gardun ke kis se uThenge

salamat rahe ye jawani tumhaari

uDa le gai dil ko pahlu se mere

adawat hui mehmani tumhaari

hasinon ko karte ho tasKHir 'akbar'

hai eajaz-e-jadu-bayani tumhaari