پھری ہے نظر ہم سے جانی تمہاری

پھری ہے نظر ہم سے جانی تمہاری

رقیبوں پہ ہے مہربانی تمہاری

فلک کو بھی بھولی ہوئیں ہیں جفائیں

ستم کر رہی ہے جوانی تمہاری

ہے بہزاد خود ایک حیرت کا پتلا

کھنچے کس سے تصویر جانی تمہاری

برنگ حنا پیس ڈالا ہے ہم کو

غضب ہے یہ اٹھتی جوانی تمہاری

نہ بدلیں گے مہر سلیماں سے اس کو

یہ چھلا ہے اے جاں نشانی تمہاری

مرے صفحۂ دل پہ جو کھنچ گئی ہے

وہ تصویر ہے ایک جانی تمہاری

ستم پیر گردوں کے کس سے اٹھیں گے

سلامت رہے یہ جوانی تمہاری

اڑا لے گئی دل کو پہلو سے میرے

عداوت ہوئی میہمانی تمہاری

حسینوں کو کرتے ہو تسخیر اکبرؔ

ہے اعجاز جادو بیانی تمہاری