apni taswir har ek dil mein laga rakhi hai

apnī tasvīr har ik dil meñ lagā rakhī hai

un butoñ ne to baḌī baat banā rakhī hai

mere nāloñ ne ajab dhuum machā rakhī hai

charḳh kī tarah zamīñ sar par uThā rakhī hai

maiñ bahut ḳhush huuñ vo miTTī mirī barbād kareñ

maiñ ne ḳhaak apnī usī din ko uThā rakhī hai

jhāñk kar dekhegā vo rashk-e-parī khiḌkī se

shakl dīvānoñ kī yuuñ ham ne banā rakhī hai

jab ḳhayāl aayā bas ik baar lagā dil khiñchne

kyā kahūñ aap ne kyā laag lagā rakhī hai

hukm jis vaqt ho hāzir maiñ karūñ jān-e-azīz

ye amānat yūñhī ai mere ḳhudā rakhī hai

aah ke saath hī fariyād bhī pahuñchegī vahāñ

nardbān ham ne falak par ye lagā rakhī hai

ye kisī roz dikhā.egī zarūr apnā asar

ham ne kaifiyat-e-dil un ko sunā rakhī hai

paḌh sakeñ ham to har ik barg hai tārīḳh-e-chaman

likhne vaale ne koī baat uThā rakhī hai

hameñ ma.alūm hai har ghaḌī meñ hai jo ġhunche kī

khol kar dekh lo us gul kī qabā rakhī hai

mere ghar meñ use allāh hamesha rakhe

naam merī shab-e-vaslat kā ḳhudā rakhī hai

but-parastī jo nahīñ hai to ye kyā hai 'akbar'

tum ne tasvīr-e-sanam dil meñ chhupā rakhī hai

apni taswir har ek dil mein laga rakhi hai

un buton ne to baDi baat bana rakhi hai

mere nalon ne ajab dhum macha rakhi hai

charKH ki tarah zamin sar par uTha rakhi hai

main bahut KHush hun wo miTTi meri barbaad karen

main ne KHak apni usi din ko uTha rakhi hai

jhank kar dekhega wo rashk-e-pari khiDki se

shakl diwanon ki yun hum ne bana rakhi hai

jab KHayal aaya bas ek bar laga dil khinchne

kya kahun aap ne kya lag laga rakhi hai

hukm jis waqt ho hazir main karun jaan-e-aziz

ye amanat yunhi ai mere KHuda rakhi hai

aah ke sath hi fariyaad bhi pahunchegi wahan

nardban hum ne falak par ye laga rakhi hai

ye kisi roz dikhaegi zarur apna asar

hum ne kaifiyat-e-dil un ko suna rakhi hai

paDh saken hum to har ek barg hai tariKH-e-chaman

likhne wale ne koi baat uTha rakhi hai

hamein malum hai har ghaDi mein hai jo ghunche ki

khol kar dekh lo us gul ki qaba rakhi hai

mere ghar mein use allah hamesha rakhe

nam meri shab-e-waslat ka KHuda rakhi hai

but-parasti jo nahin hai to ye kya hai 'akbar'

tum ne taswir-e-sanam dil mein chhupa rakhi hai