اپنی تصویر ہر اک دل میں لگا رکھی ہے

اپنی تصویر ہر اک دل میں لگا رکھی ہے

ان بتوں نے تو بڑی بات بنا رکھی ہے

میرے نالوں نے عجب دھوم مچا رکھی ہے

چرخ کی طرح زمیں سر پر اٹھا رکھی ہے

میں بہت خوش ہوں وہ مٹی مری برباد کریں

میں نے خاک اپنی اسی دن کو اٹھا رکھی ہے

جھانک کر دیکھے گا وہ رشک پری کھڑکی سے

شکل دیوانوں کی یوں ہم نے بنا رکھی ہے

جب خیال آیا بس اک بار لگا دل کھنچنے

کیا کہوں آپ نے کیا لاگ لگا رکھی ہے

حکم جس وقت ہو حاضر میں کروں جان عزیز

یہ امانت یونہی اے میرے خدا رکھی ہے

آہ کے ساتھ ہی فریاد بھی پہنچے گی وہاں

نردبان ہم نے فلک پر یہ لگا رکھی ہے

یہ کسی روز دکھائے گی ضرور اپنا اثر

ہم نے کیفیت دل ان کو سنا رکھی ہے

پڑھ سکیں ہم تو ہر اک برگ ہے تاریخ چمن

لکھنے والے نے کوئی بات اٹھا رکھی ہے

ہمیں معلوم ہے ہر گھڑی میں ہے جو غنچے کی

کھول کر دیکھ لو اس گل کی قبا رکھی ہے

میرے گھر میں اسے اللہ ہمیشہ رکھے

نام میری شب وصلت کا خدا رکھی ہے

بت پرستی جو نہیں ہے تو یہ کیا ہے اکبرؔ

تم نے تصویر صنم دل میں چھپا رکھی ہے