sultan-e-malik-e-dil hai yahan ka jo shah hai

sultān-e-malik-e-dil hai yahāñ kā jo shaah hai

ye bārgāh-e-ishq ajab bārgāh hai

ye zau na mehar kī na ye nūr-e-māh hai

terā jamāl hai ye tirī jalva-gāh hai

ai dil payām-e-maut pe tirchhī nigāh hai

is tiir kā bachāv nahīñ be-panāh hai

merā dil-e-shikasta tirī sair-gāh hai

be-shak gadā-navāz tu ai bādshāh hai

hai āstān-e-pāk-e-nabī arsh kā bhī arsh

donoñ jahān meñ yahi ik bārgāh hai

rahmat ke vāste bhī to kuchh nazr chāhiye

ai āsiyo gunāh se bachnā gunāh hai

kahiye to band karle koī aañkh kis tarah

kyā dekhnā bhī aap kī jānib gunāh hai

saaqī hai josh rahmat-e-haq ko pilā.e jā

ab vo gunāh-gār hai jo be-gunāh hai

dekho to aakar is dil-e-pur-dāġh kī bahār

tum bhī kahoge haañ ye koī sair-gāh hai

apne ḳhayāl meñ ye vahīñ jā rahe haiñ sab

jo mil gayā hameñ to vahī ḳhizr-e-rāh hai

rasta adam ke qāfile bhūle nahīñ kabhī

sīdhe vahīñ pahuñchte haiñ kyā ḳhuub raah hai

hai ḳhizr ko bhī us meñ talāsh ek ḳhizr kī

kyā haul-nāk vādī-e-ulfat kī raah hai

'akbar' ke ghar kā aap nishāñ pūchhte haiñ kyā

is be-navā faqīr kī vo ḳhānqāh hai

sultan-e-malik-e-dil hai yahan ka jo shah hai

ye bargah-e-ishq ajab bargah hai

ye zau na mehar ki na ye nur-e-mah hai

tera jamal hai ye teri jalwa-gah hai

ai dil payam-e-maut pe tirchhi nigah hai

is tir ka bachaw nahin be-panah hai

mera dil-e-shikasta teri sair-gah hai

be-shak gada-nawaz tu ai baadshah hai

hai aastan-e-pak-e-nabi arsh ka bhi arsh

donon jahan mein yahi ek bargah hai

rahmat ke waste bhi to kuchh nazr chahiye

ai aasiyo gunah se bachna gunah hai

kahiye to band karle koi aankh kis tarah

kya dekhna bhi aap ki jaanib gunah hai

saqi hai josh rahmat-e-haq ko pilae ja

ab wo gunah-gar hai jo be-gunah hai

dekho to aakar is dil-e-pur-dagh ki bahaar

tum bhi kahoge han ye koi sair-gah hai

apne KHayal mein ye wahin ja rahe hain sab

jo mil gaya hamein to wahi KHizr-e-rah hai

rasta adam ke qafile bhule nahin kabhi

sidhe wahin pahunchte hain kya KHub rah hai

hai KHizr ko bhi us mein talash ek KHizr ki

kya haul-nak wadi-e-ulfat ki rah hai

'akbar' ke ghar ka aap nishan puchhte hain kya

is be-nawa faqir ki wo KHanqah hai