aaj be-tab wo rashk-e-gul-e-tar kitna hai

aaj be-tāb vo rashk-e-gul-e-tar kitnā hai

merī aahoñ meñ ḳhudā jaane asar kitnā hai

tum jo farmāte ho dil ko mere chhoTā sā makāñ

aao ḳhud dekh lo vus.at meñ ye ghar kitnā hai

hamsarī kā qad-e-dildār kī hai sarv ko shauq

ai sabā dekh to mauzūñ ye shajar kitnā hai

haath aa.ī hai tirī halqa-ba-goshī jo use

shor dariyā meñ hai e.azāz-e-guhar kitnā hai

rose kar aatā hai do-chār ko jā kar tah-e-ḳhāk

bāvajūd is ke bhī ġhāfil ye bashar kitnā hai

de bhī Daalo kahīñ dil yaar ko tum ai 'akbar'

ḳhair agar us meñ zarar hai to zarar kitnā hai

aaj be-tab wo rashk-e-gul-e-tar kitna hai

meri aahon mein KHuda jaane asar kitna hai

tum jo farmate ho dil ko mere chhoTa sa makan

aao KHud dekh lo wusat mein ye ghar kitna hai

hamsari ka qad-e-dildar ki hai sarw ko shauq

ai saba dekh to mauzun ye shajar kitna hai

hath aai hai teri halqa-ba-goshi jo use

shor dariya mein hai eazaz-e-guhar kitna hai

rose kar aata hai do-chaar ko ja kar tah-e-KHak

bawajud is ke bhi ghafil ye bashar kitna hai

de bhi Dalo kahin dil yar ko tum ai 'akbar'

KHair agar us mein zarar hai to zarar kitna hai