آج بے تاب وہ رشک گل تر کتنا ہے

آج بے تاب وہ رشک گل تر کتنا ہے

میری آہوں میں خدا جانے اثر کتنا ہے

تم جو فرماتے ہو دل کو مرے چھوٹا سا مکاں

آؤ خود دیکھ لو وسعت میں یہ گھر کتنا ہے

ہمسری کا قد دلدار کی ہے سرو کو شوق

اے صبا دیکھ تو موزوں یہ شجر کتنا ہے

ہاتھ آئی ہے تری حلقہ بگوشی جو اسے

شور دریا میں ہے اعزاز گہر کتنا ہے

روز کر آتا ہے دو چار کو جا کر تہ خاک

باوجود اس کے بھی غافل یہ بشر کتنا ہے

دے بھی ڈالو کہیں دل یار کو تم اے اکبرؔ

خیر اگر اس میں ضرر ہے تو ضرر کتنا ہے