ruh ka pa turab hota hai

ruuh kā pā turāb hotā hai

kHāna-e-tan ḳharāb hotā hai

jab vo mah be-naqāb hotā hai

abr meñ āftāb hotā hai

josh par jab shabāb hotā hai

aur hī kuchh hisāb hotā hai

dekhiye ai charḳh-e-pīr us mah ko

aisā husn-e-shabāb hotā hai

jo bigaḌtā hai vo banegā zarūr

jo banā vo ḳharāb hotā hai

vo ga.e mere ghar se ġhair ke ghar

ye bhī kiyā inqalāb hotā hai

qabr meñ rakh ke chal diye ahbāb

yaañ savāl-o-javāb hotā hai

dekhte haiñ vo apnā chāñd-sā muñh

ā.īna āb-āb hotā hai

jahāñ ai gul terā pasīna girā

vahīñ paidā gulāb hotā hai

donoñ a.alam meñ jo rahā nākām

ishq meñ kāmyāb hotā hai

apnī had se jo baḌh chalā 'akbar'

aisā insāñ ḳharāb hotā hai

ruh ka pa turab hota hai

kHana-e-tan KHarab hota hai

jab wo mah be-naqab hota hai

abr mein aaftab hota hai

josh par jab shabab hota hai

aur hi kuchh hisab hota hai

dekhiye ai charKH-e-pir us mah ko

aisa husn-e-shabab hota hai

jo bigaDta hai wo banega zarur

jo bana wo KHarab hota hai

wo gae mere ghar se ghair ke ghar

ye bhi kiya inqalab hota hai

qabr mein rakh ke chal diye ahbab

yan sawal-o-jawab hota hai

dekhte hain wo apna chand-sa munh

aaina aab-ab hota hai

jahan ai gul tera pasina gira

wahin paida gulab hota hai

donon aalam mein jo raha nakaam

ishq mein kaamyab hota hai

apni had se jo baDh chala 'akbar'

aisa insan KHarab hota hai