is ka shikwa nahin tum se agar aaya na gaya

is kā shikvā nahīñ tum se agar aayā na gayā

is meñ kyā baat thī ham ko jo bulāyā na gayā

dil kisī tarah un āñkhoñ se bachāyā na gayā

dil hamārā hī thā ham se bhī chhupāyā na gayā

un parī-zādoñ ne dīvāna banā rakhā hai

jhaaḌ phūñkā to bahut sar se ye saayā na gayā

rahī be-lutf shab-e-ġham se ziyāda shab-e-vasl

vo kuchh is taur se rūThā ki manāyā na gayā

jāñ-nisāroñ hī se bartāv hai ġhairiyat kā

aap ke dil se kabhī apnā parāyā na gayā

na bhirī merī taraf yaar kī maḳhmūr-nigāh

mujh se bangāla kā jaadū ye jagāyā na gayā

ho ga.ī yūñhīñ sahar vasl kī shab yā qismat

mujh se vo fitna-e-ḳhvābīda jagāyā na gayā

sar-bulandoñ ko jo miTte hue dekhā 'akbar'

aisī ibrat hai ki ab tak sar uThāyā na gayā

is ka shikwa nahin tum se agar aaya na gaya

is mein kya baat thi hum ko jo bulaya na gaya

dil kisi tarah un aankhon se bachaya na gaya

dil hamara hi tha hum se bhi chhupaya na gaya

un pari-zadon ne diwana bana rakha hai

jhaD phunka to bahut sar se ye saya na gaya

rahi be-lutf shab-e-gham se ziyaada shab-e-wasl

wo kuchh is taur se ruTha ki manaya na gaya

jaan-nisaron hi se bartaw hai ghairiyat ka

aap ke dil se kabhi apna paraya na gaya

na bhiri meri taraf yar ki maKHmur-nigah

mujh se bangala ka jadu ye jagaya na gaya

ho gai yunhin sahar wasl ki shab ya qismat

mujh se wo fitna-e-KHwabida jagaya na gaya

sar-bulandon ko jo miTte hue dekha 'akbar'

aisi ibrat hai ki ab tak sar uThaya na gaya