mile usi se jo ho aadmi Thikane ka

mile usī se jo ho aadmī Thikāne kā

tumheñ ḳhabar nahīñ kyā haal hai zamāne kā

ḳhayāl aap ko ho mere ghar meñ aane kā

kahāñ nasīb ye apne faqīr-ḳhāne kā

jamāl apnā dikhāo hamārā dekho haal

mazā usī meñ hai kuchh dekhne dikhāne kā

ajal Thahar abhī jaldī na kar ḳhudā ke liye

ki intizār hai un ke javāb aane kā

jo aap aa.eñ to ham farsh boriyā bichhvāyeñ

dikhā.eñ tum ko takalluf ġharīb-ḳhāne kā

huzūr aa.e mere ghar kī baḌh ga.ī raunaq

mizāj arsh pe hai ab faqīr-ḳhāne kā

piyā hai tum ne abhī jis meñ sharbat ai zāhid

kahāñ liyā ye hai sāġhar sharāb-ḳhāne kā

chaḌhe hue haiñ bahut in dinoñ raqīb ke sar

janāb man ye natīja hai sar chaḌhāne kā

ye kārgāh-e-jahāñ hai ajab hairat-zā

chalāne vaalā hai kaun aise kār-ḳhāne kā

raqīb kī bhī havā vo nahīñ rahī 'akbar'

bigāḌ ham se muāfiq hai ab zamāne kā

mile usi se jo ho aadmi Thikane ka

tumhein KHabar nahin kya haal hai zamane ka

KHayal aap ko ho mere ghar mein aane ka

kahan nasib ye apne faqir-KHane ka

jamal apna dikhao hamara dekho haal

maza usi mein hai kuchh dekhne dikhane ka

ajal Thahar abhi jaldi na kar KHuda ke liye

ki intizar hai un ke jawab aane ka

jo aap aaen to hum farsh boriya bichhwayen

dikhaen tum ko takalluf gharib-KHane ka

huzur aae mere ghar ki baDh gai raunaq

mizaj arsh pe hai ab faqir-KHane ka

piya hai tum ne abhi jis mein sharbat ai zahid

kahan liya ye hai saghar sharab-KHane ka

chaDhe hue hain bahut in dinon raqib ke sar

janab man ye natija hai sar chaDhane ka

ye kargah-e-jahan hai ajab hairat-za

chalane wala hai kaun aise kar-KHane ka

raqib ki bhi hawa wo nahin rahi 'akbar'

bigaD hum se muafiq hai ab zamane ka