ملے اُسی سے جو ہو آدمی ٹھکانے کا

ملے اسی سے جو ہو آدمی ٹھکانے کا

تمہیں خبر نہیں کیا حال ہے زمانے کا

خیال آپ کو ہو میرے گھر میں آنے کا

کہاں نصیب یہ اپنے فقیر خانے کا

جمال اپنا دکھاؤ ہمارا دیکھو حال

مزا اسی میں ہے کچھ دیکھنے دکھانے کا

اجل ٹھہر ابھی جلدی نہ کر خدا کے لئے

کہ انتظار ہے ان کے جواب آنے کا

جو آپ آئیں تو ہم فرش بوریا بچھوائیں

دکھائیں تم کو تکلف غریب خانے کا

حضور آئے مرے گھر کی بڑھ گئی رونق

مزاج عرش پہ ہے اب فقیر خانے کا

پیا ہے تم نے ابھی جس میں شربت اے زاہد

کہاں لیا یہ ہے ساغر شراب خانے کا

چڑھے ہوئے ہیں بہت ان دنوں رقیب کے سر

جناب من یہ نتیجہ ہے سر چڑھانے کا

یہ کارگاہ جہاں ہے عجب حیرت زا

چلانے والا ہے کون ایسے کارخانے کا

رقیب کی بھی ہوا وہ نہیں رہی اکبرؔ

بگاڑ ہم سے موافق ہے اب زمانہ کا