dil uski yaad se kabhi Khaali raha nahin

dil us kī yaad se kabhī ḳhālī rahā nahīñ

ye ghar vo hai ki jab se basā hai luTā nahīñ

ai jaan maiñ kisī ko bhī pahchāntā nahīñ

tere sivā ḳhayāl meñ koī rahā nahīñ

jitnā taḌapnā thā bismil taḌap chukā

ab ruuh meñ nikalne kā bhī dam rahā nahīñ

jo shai banī jahān meñ vo miT ga.ī zarūr

o be-ḳhabar ġhurūr kisī kā rahā nahīñ

jo kuchh thī shān-e-husn huī aap par tamām

ab to kisī hasīñ ke liye kuchh rahā nahīñ

yuuñ inqilāb-e-dahr ne mujh ko miTā diyā

banñe kā koī juzv bhī baaqī rahā nahīñ

do din kā hai shabāb phir us par ye zor-o-shor

sūraj ko bhī zavāl hai tū ne sunā nahīñ

uftād naam jis kā hai duniyā meñ vo ye hai

jis ko girāyā terī nazar ne uThā nahīñ

maiñ qabr meñ bhī dekhtā huuñ terā rāsta

ye muñh kahīñ bhī terī taraf se phirā nahīñ

baḳhshish ko tere naam kamī bhī nahīñ hai yaad

ab tak to is tarah koī dariyā chaḌhā nahii.

'akbar' hai qasr shah kā jharoka ye dil tirā

kyuuñ roz-o-shab tū is kī taraf dekhtā nahīñ

dil us ki yaad se kabhi KHali raha nahin

ye ghar wo hai ki jab se basa hai luTa nahin

ai jaan main kisi ko bhi pahchanta nahin

tere siwa KHayal mein koi raha nahin

jitna taDapna tha bismil taDap chuka

ab ruh mein nikalne ka bhi dam raha nahin

jo shai bani jahan mein wo miT gai zarur

o be-KHabar ghurur kisi ka raha nahin

jo kuchh thi shan-e-husn hui aap par tamam

ab to kisi hasin ke liye kuchh raha nahin

yun inqilab-e-dahr ne mujh ko miTa diya

banne ka koi juzw bhi baqi raha nahin

do din ka hai shabab phir us par ye zor-o-shor

suraj ko bhi zawal hai tu ne suna nahin

uftad nam jis ka hai duniya mein wo ye hai

jis ko giraya teri nazar ne uTha nahin

main qabr mein bhi dekhta hun tera rasta

ye munh kahin bhi teri taraf se phira nahin

baKHshish ko tere nam kami bhi nahin hai yaad

ab tak to is tarah koi dariya chaDha nahi

'akbar' hai qasr shah ka jharoka ye dil tera

kyun roz-o-shab tu is ki taraf dekhta nahin