ro kar aankhon ne jo raaz-e-ishq ifsha kar diya

ro kar āñkhoñ ne jo rāz-e-ishq ifshā kar diyā

aap bhī ġhārat huiiñ mujh ko bhī rusvā kar diyā

be-mitā.e ab na chhoḌegā use ye āsmāñ

Dher merī ḳhaak kā kyuuñ itnā ūñchā kar diyā

be-niyāzī ishq kā hai intihā.ī martaba

baḌh ke jazb-e-shauq ne majnūñ ko lailā kar diyā

sahr se bhī kaam lete haiñ ye but-e-e.ajāz kā

us ne mujh ko dekh kar āñkhoñ se zinda kar diyā

kyā kahūñ pāzeb kis zālim ne pahnā dī tumheñ

do qadam chal kar jahāñ meñ hashr barpā kar diyā

dekh kar hālat marī ghabrā ke vo ruḳhsat hue

dard-e-dil kambaḳht tū ne uTh ke ye kyā kar diyā

haiñ pasīne ko jo qatre ruḳh par ab a.alam hai aur

husn kī garmī ne us ko chāñd-tārā kar diyā

aa.iye ab sāmne allāh ke dījiye javāb

hashr hai maiñ ne bhī daa.ir apnā da.avā kar diyā

ai shab-e-hijr sanam kitnī hai tujh meñ tīrgī

merī āñkhoñ meñ zamāne ko añdherā kar diyā

fā.eda kyā teġh-e-qātil se rahe nā-haq bhī laag

de diyā sar kaaT kar tai ham ne jhagḌā kar diyā

kījiye ai jaan kuchh to merī vahshat kā ilaaj

dekhiye un āñkhoñ ne kyā haal merā kar diyā

ik nigāh-e-nāz par dil un ke hāthoñ bik gayā

thā bahut mahñgā ye saudā maiñ ne sastā kar diyā

sāne-e-qudrat tire hāthoñ ke qurbāñ vaah vaah

ḳhaak ke putle ko nūrānī sarāpā kar diyā

ro kar aankhon ne jo raaz-e-ishq ifsha kar diya

aap bhi ghaarat huin mujh ko bhi ruswa kar diya

be-mitae ab na chhoDega use ye aasman

Dher meri KHak ka kyun itna uncha kar diya

be-niyazi ishq ka hai intihai martaba

baDh ke jazb-e-shauq ne majnun ko laila kar diya

sahr se bhi kaam lete hain ye but-e-eajaz ka

us ne mujh ko dekh kar aankhon se zinda kar diya

kya kahun pazeb kis zalim ne pahna di tumhein

do qadam chal kar jahan mein hashr barpa kar diya

dekh kar haalat mari ghabra ke wo ruKHsat hue

dard-e-dil kambaKHt tu ne uTh ke ye kya kar diya

hain pasine ko jo qatre ruKH par ab aalam hai aur

husn ki garmi ne us ko chand-tara kar diya

aaiye ab samne allah ke dijiye jawab

hashr hai main ne bhi dair apna dawa kar diya

ai shab-e-hijr sanam kitni hai tujh mein tirgi

meri aankhon mein zamane ko andhera kar diya

faeda kya tegh-e-qatil se rahe na-haq bhi lag

de diya sar kaT kar tai hum ne jhagDa kar diya

kijiye ai jaan kuchh to meri wahshat ka ilaj

dekhiye un aankhon ne kya haal mera kar diya

ek nigah-e-naz par dil un ke hathon bik gaya

tha bahut mahnga ye sauda main ne sasta kar diya

sane-e-qudrat tere hathon ke qurban wah wah

KHak ke putle ko nurani sarapa kar diya