qatl aashiq ko kya us ka taDapna dekha

qatl āshiq ko kyā us kā taḌapnā dekhā

dil ko thāme hue baiThe ho tamāsha dekhā

jis ne qatroñ kī haqīqat pe nazar Daalī hai

usī aarif ne hai dariyā kā tamāsha dekhā

apne kushtoñ kī taḌap dekh ke betāb ho kyuuñ

kaisā dilchasp tamāsha hai tamāsha dekhā

haath ko joḌ ke phir arz kar un se 'akbar'

dil ko thāme hue baiThe ho tamāsha dekhā

jitne tiir aa.e tumhāre liye sab siine par

apne shaidā.iyoñ kā tum ne kaleja dekhā

us kī aahoñ kī shikāyat thī tumheñ ḳhvāb ke vaqt

ab to niiñd aa.egī āshiq kā janāza dekhā

ai ḳhudā shukr tirā tū ne vo āñḳheñ baḳhshīñ

ke sivā tere na muñh aur kisī kā dekhā

būñdeñ paḌtī haiñ samundar meñ to aatī hai sadā

qatre is tarah banā karte haiñ dariyā dekhā

āshiqī naam musībat kā hai chain us meñ kahāñ

rañj par rañj sahe sadma pe sadma dekhā

kahiye kuchh aur bhī thā aap kī ulfat ke sivā

chaak kar ke dil-e-ḳhūñ-gashta hamārā dekhā

hech hai apnī nigāhoñ meñ ye duniyā 'akbar'

jab se muñh ham ne hai ik mard-e-ḳhudā kā dekhā

qatl aashiq ko kya us ka taDapna dekha

dil ko thame hue baiThe ho tamasha dekha

jis ne qatron ki haqiqat pe nazar Dali hai

usi aarif ne hai dariya ka tamasha dekha

apne kushton ki taDap dekh ke betab ho kyun

kaisa dilchasp tamasha hai tamasha dekha

hath ko joD ke phir arz kar un se 'akbar'

dil ko thame hue baiThe ho tamasha dekha

jitne tir aae tumhaare liye sab sine par

apne shaidaiyon ka tum ne kaleja dekha

us ki aahon ki shikayat thi tumhein KHwab ke waqt

ab to nind aaegi aashiq ka janaza dekha

ai KHuda shukr tera tu ne wo aanKHen baKHshin

ke siwa tere na munh aur kisi ka dekha

bunden paDti hain samundar mein to aati hai sada

qatre is tarah bana karte hain dariya dekha

aashiqi nam musibat ka hai chain us mein kahan

ranj par ranj sahe sadma pe sadma dekha

kahiye kuchh aur bhi tha aap ki ulfat ke siwa

chaak kar ke dil-e-KHun-gashta hamara dekha

hech hai apni nigahon mein ye duniya 'akbar'

jab se munh hum ne hai ek mard-e-KHuda ka dekha