abhi aae the abhi chal base marne wale

abhī aa.e the abhī chal base marne vaale

yuuñ safar karte haiñ duniyā se guzarne vaale

āfateñ Dhāte haiñ duniyā meñ sañvarne vaale

luuTe lete haiñ zamāne ko nikharne vaale

baiTheñ ḳhush ho ke na ġhunchoñ meñ nikharne vaale

sab ke sab misal gul ik din haiñ bikharne vaale

aap miT jaa.eñ magar radd na ho saa.el kā savāl

ham to haiñ qabr kā muñh ḳhaak se bharne vaale

dekh ai qabr badan un kā na melā ho kahīñ

duudh ke dho.e hue haiñ ye nikharne vaale

naam se rāh-e-adam ke hameñ kyuuñ vahshat hai

sab usī raah se ik din haiñ guzarne vaale

khul gayā bhed hameñ yaar tire ghūñgaT kā

muñh dikhāte nahīñ dil le ke mukarne vaale

vasl kī fikr to kī zor na qismat se chalā

kaam vo aur hī hote haiñ sañvarne vaale

ḳhuub dekhī hai añdherī shab-e-ġham kī 'akbar'

ham nahīñ tīrgī-e-qabr se Darne vaale

abhi aae the abhi chal base marne wale

yun safar karte hain duniya se guzarne wale

aafaten Dhate hain duniya mein sanwarne wale

luTe lete hain zamane ko nikharne wale

baiThen KHush ho ke na ghunchon mein nikharne wale

sab ke sab misal gul ek din hain bikharne wale

aap miT jaen magar radd na ho sael ka sawal

hum to hain qabr ka munh KHak se bharne wale

dekh ai qabr badan un ka na mela ho kahin

dudh ke dhoe hue hain ye nikharne wale

nam se rah-e-adam ke hamein kyun wahshat hai

sab usi rah se ek din hain guzarne wale

khul gaya bhed hamein yar tere ghungaT ka

munh dikhate nahin dil le ke mukarne wale

wasl ki fikr to ki zor na qismat se chala

kaam wo aur hi hote hain sanwarne wale

KHub dekhi hai andheri shab-e-gham ki 'akbar'

hum nahin tirgi-e-qabr se Darne wale