dar-e-yar se sar ko ragDa karenge

dar-e-yār se sar ko ragḌā kareñge

yahīñ ham muqaddar ko sīdhā kareñge

falak kaj-ravī se nahīñ baaz aatā

hamīñ ek din us ko sīdhā kareñge

chhupāyā hameñ dekh kar tum ne muñh ko

bas ab ham bhī duniyā se pardā kareñge

ġhazab hai raqīb un ke pahlū meñ baiThe

jo qismat dikhā.egī dekhā kareñge

bahut duur hai ka.aba pahuñcheñ na pahuñcheñ

isī āstāne ko chūmā kareñge

bahut ḳhush hue de ke dil us ko 'akbar'

bas ab umr-bhar aap royā kareñge

dar-e-yar se sar ko ragDa karenge

yahin hum muqaddar ko sidha karenge

falak kaj-rawi se nahin baz aata

hamin ek din us ko sidha karenge

chhupaya hamein dekh kar tum ne munh ko

bas ab hum bhi duniya se parda karenge

ghazab hai raqib un ke pahlu mein baiThe

jo qismat dikhaegi dekha karenge

bahut dur hai kaba pahunchen na pahunchen

isi aastane ko chuma karenge

bahut KHush hue de ke dil us ko 'akbar'

bas ab umr-bhar aap roya karenge