nikli jo ruh jism se phir hai badan mein kya

niklī jo ruuh jism se phir hai badan meñ kyā

jab sham.a bujh ga.ī to rahā anjuman meñ kyā

baiThe hue haiñ uThne ko dil chāhtā nahīñ

khultā nahīñ hameñ ke hai is anjuman meñ kyā

majma.a hai mere dil meñ hasīnoñ kā aaj kyuuñ

raunaq-fazā hai yaar isī anjuman meñ kyā

vo sher kyā ki jo nashtar chubhā na de

ho jis meñ bū na dard kī hai is suḳhan meñ kyā

ham jānte haiñ vasl kā deñge jo vo javāb

yaad un ko hai nahīñ ke sivā har suḳhan meñ kyā

TeḌhā javāb dete ho tum sīdhī baat kā

yaad ek adā yahī hai tumheñ bāñkpan meñ kyā

ai barahman kisī se ye kyuuñ bolte nahīñ

taalā paḌā huā hai butoñ ke dahan meñ kyā

kyā shukr koī ne.amat-e-haq kā adā kare

letī hai zā.iqe ye zabāñ us dahan meñ kyā

ahbāb sab musāfir mulk-e-adam hue

ab ham akele rah ke kareñge vatan meñ kyā

'akbar' mirī ġhazal ko zarā tū bhī dekh le

kyā jaane bik gayā huuñ maiñ dīvāna-pan meñ kyā

nikli jo ruh jism se phir hai badan mein kya

jab shama bujh gai to raha anjuman mein kya

baiThe hue hain uThne ko dil chahta nahin

khulta nahin hamein ke hai is anjuman mein kya

majma hai mere dil mein hasinon ka aaj kyun

raunaq-faza hai yar isi anjuman mein kya

wo sher kya ki jo nashtar chubha na de

ho jis mein bu na dard ki hai is suKHan mein kya

hum jaante hain wasl ka denge jo wo jawab

yaad un ko hai nahin ke siwa har suKHan mein kya

TeDha jawab dete ho tum sidhi baat ka

yaad ek ada yahi hai tumhein bankpan mein kya

ai barahman kisi se ye kyun bolte nahin

tala paDa hua hai buton ke dahan mein kya

kya shukr koi neamat-e-haq ka ada kare

leti hai zaiqe ye zaban us dahan mein kya

ahbab sab musafir mulk-e-adam hue

ab hum akele rah ke karenge watan mein kya

'akbar' meri ghazal ko zara tu bhi dekh le

kya jaane bik gaya hun main diwana-pan mein kya