putle mein aaya KHak ke aadam kaha gaya

putle meñ aayā ḳhaak ke aadam kahā gayā

jalva har ek rañg meñ ham ko dikhā gayā

tauhīd kā sabaq hameñ us ne paḌhā diyā

parda thā ik ḳhudī kā so vo bhī uThā diyā

āḳhir junūn-e-'ishq ne kyā kyā kiyā sulūk

sab ustuḳhvān aur rag-o-pai ko jalā gayā

thī aarzū yahī ki koī ghūñT ho nasīb

vo ḳhum kā ḳhum mujhe mai-e-vahdat pilā gayā

qātil banā hai aap aur maqtūl hai vahī

mansūr ban ke aap ko suulī chaḌhā gayā

jis ko talāsh karatā hai tū kū-ba-kū 'azīz

ab dekh har bashar meñ vo aake samā gayā

putle mein aaya KHak ke aadam kaha gaya

jalwa har ek rang mein hum ko dikha gaya

tauhid ka sabaq hamein us ne paDha diya

parda tha ek KHudi ka so wo bhi uTha diya

aaKHir junun-e-'ishq ne kya kya kiya suluk

sab ustuKHwan aur rag-o-pai ko jala gaya

thi aarzu yahi ki koi ghunT ho nasib

wo KHum ka KHum mujhe mai-e-wahdat pila gaya

qatil bana hai aap aur maqtul hai wahi

mansur ban ke aap ko suli chaDha gaya

jis ko talash karata hai tu ku-ba-ku 'aziz

ab dekh har bashar mein wo aake sama gaya