پتلے میں آیا خاک کے آدم کہا گیا

پتلے میں آیا خاک کے آدم کہا گیا

جلوہ ہر ایک رنگ میں ہم کو دکھا گیا

توحید کا سبق ہمیں اس نے پڑھا دیا

پردہ تھا اک خودی کا سو وہ بھی اٹھا دیا

آخر جنون عشق نے کیا کیا کیا سلوک

سب استخوان اور رگ و پے کو جلا گیا

تھی آرزو یہی کہ کوئی گھونٹ ہو نصیب

وہ خم کا خم مجھے مئے وحدت پلا گیا

قاتل بنا ہے آپ اور مقتول ہے وہی

منصور بن کے آپ کو سولی چڑھا گیا

جس کو تلاش کرتا ہے تو کو بکو عزیزؔ

اب دیکھ ہر بشر میں وہ آکے سما گیا