dekhne jab apnī surat wo pari-paikar laga

dekhne jab apnī sūrat vo parī-paikar lagā

ban gayā ā.īna jogī muñh ko ḳhākistar lagā

chashm-e-naqsh-e-pā se haiñ pāmāl hasrat dekhiye

gosha-e-dāman ko apne aur bhī Thokar lagā

der kyuuñ kartā hai phir kyā jāniye kis kā ho daur

sāqiyā lab se hamāre tū lab-e-sāġhar lagā

ḳhat ke aane se paḌā hai shor mulk-e-husn meñ

daan kar sūraj-gahan kahte haiñ ai dilbar lagā

dekhiye ye jāñ-fishānī kyā dikhā.egī hameñ

tere muñh se to lahū be-vaj.h chashm-e-tar lagā

kis tarah laġhzish ho pā-e-istaqāmat ko mire

sham.a-sāñ mahfil meñ terī hai qadam sar se lagā

misl-e-naqsh-e-pā yahāñ mumkin nahīñ hai baiThnā

ai musāfir uTh kahīñ aur dosh se bistar lagā

naḳhl-e-qāmat ne tirī daulat pe phal paayā junūñ

jis taraf niklā udhar se ik na ik patthar lagā

shāḳh-e-gul chheḌī hai kis ne kyuuñ qalam kartā hai haath

dīda-o-dānista ab bohtān mat ham par lagā

aap se aa.e nahīñ ham sair karne bāġhbāñ

laa.ī hai bād-e-sabā gulshan meñ lipTā kar lagā

intizār-e-qāsid-e-gum-gashta ne maarā 'nasīr'

kis tarah uḌ jā.iye kūche meñ us ke par lagā

dekhne jab apnī surat wo pari-paikar laga

ban gaya aaina jogi munh ko KHakistar laga

chashm-e-naqsh-e-pa se hain pamal hasrat dekhiye

gosha-e-daman ko apne aur bhi Thokar laga

der kyun karta hai phir kya jaaniye kis ka ho daur

saqiya lab se hamare tu lab-e-saghar laga

KHat ke aane se paDa hai shor mulk-e-husn mein

dan kar suraj-gahan kahte hain ai dilbar laga

dekhiye ye jaan-fishani kya dikhaegi hamein

tere munh se to lahu be-wajh chashm-e-tar laga

kis tarah laghzish ho pa-e-istaqamat ko mere

shama-san mahfil mein teri hai qadam sar se laga

misl-e-naqsh-e-pa yahan mumkin nahin hai baiThna

ai musafir uTh kahin aur dosh se bistar laga

naKHl-e-qamat ne teri daulat pe phal paya junun

jis taraf nikla udhar se ek na ek patthar laga

shaKH-e-gul chheDi hai kis ne kyun qalam karta hai hath

dida-o-danista ab bohtan mat hum par laga

aap se aae nahin hum sair karne baghban

lai hai baad-e-saba gulshan mein lipTa kar laga

intizar-e-qasid-e-gum-gashta ne mara 'nasir'

kis tarah uD jaiye kuche mein us ke par laga