haar bana in para-e-dil ka mang na gajra phulon ka

haar banā in pārā-e-dil kā maañg na gajrā phūloñ kā

aur kahāñ se āshiq-e-muflis ye gahnā phūloñ kā

dekhe hai vo sehn-e-chaman meñ jā ke tamāshā phūloñ kā

dāġhoñ se ban jaaye ye siina kaash ki taḳhta phūloñ kā

kaash dil-e-sad-chāk ye ban kar bechne vaalā phūloñ kā

kū-e-butāñ meñ jā ke pukāre lo koī gajrā phūloñ kā

harf nahīñ hai dīda-e-tar TukḌoñ se jigar ke laa.eq par

sail-e-ashk ko dariyā samjho us ko nivāḌā phūloñ kā

sub.h nahīñ be-vaj.h jalā.e laale ne gulshan meñ charāġh

dekh ruḳh-e-gulnār-e-sanam niklā hai vo laala phūloñ kā

mujh ko na le chal bād-e-bahārī rañg-e-chaman hai vahshat-ḳhez

jeb se le kar dāman tak sau TukḌe kartā phūloñ kā

tū ne liTāyā añgāroñ par sub.h talak ai va.ada-ḳhilāf

terī ḳhātir ham ne kiyā thā shab ko bichhaunā phūloñ kā

silk-e-sarishk-e-surḳh zamīñ tak tujh ko dikhāve mizhgāñ se

phuljhaḌī aisī chhoḌ koī huuñ maiñ bhī lachhā phūloñ kā

kaan se tere jhuk jhuk kar ye letā hai bose aariz ke

yā to hamāre TukḌe kar yā toḌ ye baalā phūloñ kā

dhuup meñ us kā haaye qafas sayyād sitam ījād rakhe

rahtā thā jis murġh-e-chaman ke sar par saayā phūloñ kā

jhal khaa.e aġhyār na kyūñ-kar kal-e-chilvan se haath nikāl

maarā thā us parda-nashīñ ne mujh ko pañkhā phūloñ kā

ishq meñ tere gul khā kar jaan apnī dī hai 'nasīr' ne aah

us ke sar-e-marqad par gul rolā koī donā phūloñ kā

haar bana in para-e-dil ka mang na gajra phulon ka

aur kahan se aashiq-e-muflis ye gahna phulon ka

dekhe hai wo sehn-e-chaman mein ja ke tamasha phulon ka

daghon se ban jaye ye sina kash ki taKHta phulon ka

kash dil-e-sad-chaak ye ban kar bechne wala phulon ka

ku-e-butan mein ja ke pukare lo koi gajra phulon ka

harf nahin hai dida-e-tar TukDon se jigar ke laeq par

sail-e-ashk ko dariya samjho us ko niwaDa phulon ka

subh nahin be-wajh jalae lale ne gulshan mein charagh

dekh ruKH-e-gulnar-e-sanam nikla hai wo lala phulon ka

mujh ko na le chal baad-e-bahaari rang-e-chaman hai wahshat-KHez

jeb se le kar daman tak sau TukDe karta phulon ka

tu ne liTaya angaron par subh talak ai wada-KHilaf

teri KHatir hum ne kiya tha shab ko bichhauna phulon ka

silk-e-sarishk-e-surKH zamin tak tujh ko dikhawe mizhgan se

phuljhaDi aisi chhoD koi hun main bhi lachha phulon ka

kan se tere jhuk jhuk kar ye leta hai bose aariz ke

ya to hamare TukDe kar ya toD ye baala phulon ka

dhup mein us ka haye qafas sayyaad sitam ijad rakhe

rahta tha jis murgh-e-chaman ke sar par saya phulon ka

jhal khae aghyar na kyun-kar kal-e-chilwan se hath nikal

mara tha us parda-nashin ne mujh ko pankha phulon ka

ishq mein tere gul kha kar jaan apnī di hai 'nasir' ne aah

us ke sar-e-marqad par gul rola koi dona phulon ka