phenk kar barchhi nigah ki dil pe kyun khinche hain aap

pheñk kar barchhī nigah kī dil pe kyuuñ khīñche haiñ aap

māhī-e-dariyā nahīñ sāhil pe kyuuñ khīñche haiñ aap

naqsh nūr-e-mehr hai aḳhtar jo us ke muñh chaḌhe

is qadar duur aap ko ik til pe kyuuñ khīñche haiñ aap

qābil-e-sohbat tumhāre aur haiñ haihāt aap

haath ko mere sar-e-mahfil ye kyuuñ khīñche haiñ aap

dekho kū-e-yār meñ mat hazrat-e-dil rāh-e-ashk

intizār-e-qāfila manzil pe kyuuñ khīñche haiñ aap

ḳhāna-e-tan meñ mire sahmī hai jaañ abrū-kamāñ

tīr-e-mizhgāñ dekh-bhāl us dil pe kyuuñ khīñche haiñ aap

sārbān-e-fāqa-e-lailā se kyā kahtā hai qais

aaj Dore parda-e-mahmil pe kyuuñ khīñche haiñ aap

koī dam duniyā kī us ko aur khāne do havā

teġh bismillāh kah bismil pe kyuuñ khīñche haiñ aap

naqsh biThlānā dil-e-shīrīñ pe thā ai kohkan

is kā naqsha sañg kī us sil pe kyuuñ khīñche haiñ aap

koī us kā ho garebāñ-gīr ye kahtā nahīñ

bāġhbāñ dāmān-e-gul ko gul pe kyuuñ khīñche haiñ aap

tum to daanā ho kaheñ kyā ai 'nasīr' itnā ye rañj

mazra.a duniyā-e-lā-hāsil pe kyuuñ khīñche haiñ aap

phenk kar barchhi nigah ki dil pe kyun khinche hain aap

mahi-e-dariya nahin sahil pe kyun khinche hain aap

naqsh nur-e-mehr hai aKHtar jo us ke munh chaDhe

is qadar dur aap ko ek til pe kyun khinche hain aap

qabil-e-sohbat tumhaare aur hain haihat aap

hath ko mere sar-e-mahfil ye kyun khinche hain aap

dekho ku-e-yar mein mat hazrat-e-dil rah-e-ashk

intizar-e-qafila manzil pe kyun khinche hain aap

KHana-e-tan mein mere sahmi hai jaan abru-kaman

tir-e-mizhgan dekh-bhaal us dil pe kyun khinche hain aap

sarban-e-faqa-e-laila se kya kahta hai qais

aaj Dore parda-e-mahmil pe kyun khinche hain aap

koi dam duniya ki us ko aur khane do hawa

tegh bismillah kah bismil pe kyun khinche hain aap

naqsh biThlana dil-e-shirin pe tha ai kohkan

is ka naqsha sang ki us sil pe kyun khinche hain aap

koi us ka ho gareban-gir ye kahta nahin

baghban daman-e-gul ko gul pe kyun khinche hain aap

tum to dana ho kahen kya ai 'nasir' itna ye ranj

mazra duniya-e-la-hasil pe kyun khinche hain aap