tu ne jo ki ai jaan-e-mahfil jaane ki tayyari raat

tū ne jo kī ai jān-e-mahfil jaane kī tayyārī raat

sham.a ne phir suulī par kaaTī rote rote saarī raat

baḳht-e-siyah kyā apne kahiye tū jo na aayā māh-jabīñ

taare ginte sub.h kī ham ne āñkhoñ meñ añdhiyārī raat

dil ne to aap ko rokā thā jaane se vahāñ ke lekin aah

le ga.ī thī bīmār ko us ke kūche meñ nā-chārī raat

chashm-e-qamar kī tarah lagtī hī nahīñ be-mehr zarā

sone kab detī hai pal-bhar tujh bin ye bedārī raat

din bhī guzrā shaam huī par ḳhuub tum aa.e merī jaan

karnī paḌī us dil kī apne-āp hameñ dildārī raat

bhuul gayā vo sair-e-tamāshā dekh ke ātish-bāzī kā

āh-e-sharar-afshāñ ne aisī dikhlā.ī gul-kārī raat

dekhiye ham se kab vo milegā rashk-e-qamar ai vaa.e 'nasīr'

din to guzārā jūñ-tūñ kar hai qahr-e-qayāmat bhārī raat

tu ne jo ki ai jaan-e-mahfil jaane ki tayyari raat

shama ne phir suli par kaTi rote rote sari raat

baKHt-e-siyah kya apne kahiye tu jo na aaya mah-jabin

tare ginte subh ki hum ne aankhon mein andhiyari raat

dil ne to aap ko roka tha jaane se wahan ke lekin aah

le gai thi bimar ko us ke kuche mein na-chaari raat

chashm-e-qamar ki tarah lagti hi nahin be-mehr zara

sone kab deti hai pal-bhar tujh bin ye bedari raat

din bhi guzra sham hui par KHub tum aae meri jaan

karni paDi us dil ki apne-ap hamein dildari raat

bhul gaya wo sair-e-tamasha dekh ke aatish-bazi ka

aah-e-sharar-afshan ne aisi dikhlai gul-kari raat

dekhiye hum se kab wo milega rashk-e-qamar ai wae 'nasir'

din to guzara jun-tun kar hai qahr-e-qayamat bhaari raat