jab ki chashm-e-surma sa apnī dikha jate ho tum

jab ki chashm-e-surma sā apnī dikhā jaate ho tum

ḳhaak meñ ham ko baras sūrat milā jaate ho tum

sho.ala-e-ātish sarāpā ban ke ai gulgūñ qabā

aag mere dil meñ dar-parda lagā jaate ho tum

kaan kā baalā hai yā girdāb-e-bahr-e-husn hai

kashti-e-dil ko jo merī ab Dubā jaate ho tum

chhoḌ do ai hazrat-e-dil un kī zulfoñ kā ḳhayāl

har kisī ke daam meñ be-vaj.h aa jaate ho tum

haar phūloñ kā pahante ho to ham-bistar bhī ho

varna añgāroñ pe kyuuñ mujh ko luTā jaate ho tum

jalva-e-qāmat tumhārā kam qayāmat se nahīñ

fitna-e-ḳhvābīda ko aa kar jagā jaate ho tum

sar paTakte haiñ paḌe ham halqa-e-dar kī tarah

chāk-e-dar se jab kabhī āñkheñ laḌā jaate ho tum

kaan kā motī chhupāo tifl-e-nādāñ hai ye dil

us ko luulū se hamesha kyuuñ Darā jaate ho tum

chain se sone do Tak āsūdgān-e-ḳhāk ko

sar pa ik shor-e-qayāmat kyuuñ uThā jaate ho tum

huuñ giraftār-e-qafas ai ham-safīrān-e-chaman

nāla-hā-e-zār kyuuñ apne sunā jaate ho tum

kyuuñ na hañs-hañs kar jalūñ juuñ kāġhaz-e-ātish-zada

jis tamāshe ke liye mujh ko jalā jaate ho tum

jaan kho baiThegā apnī ye 'nasīr'-e-ḳhasta-dil

us ke pahlū se ab uTh kar ghar ko kyā jaate ho tam

jab ki chashm-e-surma sa apnī dikha jate ho tum

KHak mein hum ko baras surat mila jate ho tum

shoala-e-atish sarapa ban ke ai gulgun qaba

aag mere dil mein dar-parda laga jate ho tum

kan ka baala hai ya girdab-e-bahr-e-husn hai

kashti-e-dil ko jo meri ab Duba jate ho tum

chhoD do ai hazrat-e-dil un ki zulfon ka KHayal

har kisi ke dam mein be-wajh aa jate ho tum

haar phulon ka pahante ho to ham-bistar bhi ho

warna angaron pe kyun mujh ko luTa jate ho tum

jalwa-e-qamat tumhaara kam qayamat se nahin

fitna-e-KHwabida ko aa kar jaga jate ho tum

sar paTakte hain paDe hum halqa-e-dar ki tarah

chaak-e-dar se jab kabhī aankhen laDa jate ho tum

kan ka moti chhupao tifl-e-nadan hai ye dil

us ko lulu se hamesha kyun Dara jate ho tum

chain se sone do Tak aasudgan-e-KHak ko

sar pa ek shor-e-qayamat kyun uTha jate ho tum

hun giraftar-e-qafas ai ham-safiran-e-chaman

nala-ha-e-zar kyun apne suna jate ho tum

kyun na hans-hans kar jalun jun kaghaz-e-atish-zada

jis tamashe ke liye mujh ko jala jate ho tum

jaan kho baiThega apnī ye 'nasir'-e-KHasta-dil

us ke pahlu se ab uTh kar ghar ko kya jate ho tam