nahana mat tu ai rashk-e-pari zinhaar pani mein

nahānā mat tū ai rashk-e-parī zinhār paanī meñ

habāb aisā na ho shīsha bane ik baar paanī meñ

sunā ai bahr-e-ḳhūbī terī aTkhelī se chalne kī

uḌaa.ī rafta rafta mauj ne raftār paanī meñ

jhalak us tere kafash-e-pusht-e-māhī kī agar dekhe

kare qālib thī maahī bhī phir lāchār paanī meñ

nahīñ laḳht-e-jigar ye chashm meñ phirte ki mardum ne

charāġh ab karke raushan chhoḌe haiñ do-chār paanī meñ

lab-e-dariyā pe dekh aa kar tamāshā aaj holī kā

bhañvar kā le ke daf baaje hai mauj ai yaar paanī meñ

kahūñ kyā saath ġhairoñ ke to is be-dīd ne hamdam

nahāne ke liye hargiz na kī takrār paanī meñ

kahā maiñ ne jo itnā rakh qadam us dīda-e-tar par

lagā kahne ki aatī hai mirī paizār paanī meñ

'nasīr' āsāñ nahīñ ye baat paanī saḳht mushkil hai

uThā.ī reḳhte kī tū ne kyā dīvār paanī meñ

nahana mat tu ai rashk-e-pari zinhaar pani mein

habab aisa na ho shisha bane ek bar pani mein

suna ai bahr-e-KHubi teri aTkheli se chalne ki

uDai rafta rafta mauj ne raftar pani mein

jhalak us tere kafash-e-pusht-e-mahi ki agar dekhe

kare qalib thi mahi bhi phir lachaar pani mein

nahin laKHt-e-jigar ye chashm mein phirte ki mardum ne

charagh ab karke raushan chhoDe hain do-chaar pani mein

lab-e-dariya pe dekh aa kar tamasha aaj holi ka

bhanwar ka le ke daf baje hai mauj ai yar pani mein

kahun kya sath ghairon ke to is be-did ne hamdam

nahane ke liye hargiz na ki takrar pani mein

kaha main ne jo itna rakh qadam us dida-e-tar par

laga kahne ki aati hai meri paizar pani mein

'nasir' aasan nahin ye baat pani saKHt mushkil hai

uThai reKHte ki tu ne kya diwar pani mein