bas mein kar un ungliyon ke tu na poron ko hina

bas meñ kar un uñgliyoñ ke tū na poroñ ko hinā

haath lag jaaye to duuñ maiñ tujh ko choroñ ko hinā

ahl-e-duniyā ke kab aayā rañg-e-darveshī kā haath

kyā lagānā chāhai hāthoñ meñ goroñ ko hinā

ai sabā kyā muñh hai jo da.avā-e-ham-rañgī kare

dekh kar gulshan meñ phūloñ ke kaToroñ ko hinā

suraḳh-rū mehñdī lagā kar kyā ho ma.ashūq-e-habash

jab lagāne baiThe tū hāthoñ meñ goroñ ko hinā

dar pe lagvātā hai gar apne shahīdoñ kī sabīl

to phir ai qātil lagā tū āb-ḳhoroñ ko hinā

nāḳhun-e-añgusht-e-dast-e-mahvshāñ ko kar ke surḳh

misl-e-aḳhgar kar dikhātī hai chakoroñ ko hinā

rakh dil par daaġh mat is kā ḳhayāl-e-ḳhat-e-sabz

paañv se milte nahīñ dekhā hai moroñ ko hinā

dil se tū pis jaaye sar se qasd-e-pā-bosī kare

gar tire āñkhoñ ke dekhe surḳh Doroñ ko hinā

mat milā mah-tal.atoñ se haath kyuuñ tuḌvā.e hai

panja-e-ḳhurshīd se pūchh un ke zoroñ ko hinā

juuñ rag-e-barg-e-gul-e-ahmar banā de hai yahāñ

do ghaḌī meñ us ke har nāḳhun kī koroñ ko hinā

mehr-o-mah rañg-e-shafaq se surḳh haiñ ye sub.h-o-shām

milte haiñ ḳhūn-e-jigar dekh un sakoroñ ko hinā

duzdī-e-rañg-e-hinā.ī jo kare haiñ ai 'nasīr'

de hai hāthoñ-hāth bandhvā aise choroñ ko hinā

bas mein kar un ungliyon ke tu na poron ko hina

hath lag jaye to dun main tujh ko choron ko hina

ahl-e-duniya ke kab aaya rang-e-darweshi ka hath

kya lagana chahai hathon mein goron ko hina

ai saba kya munh hai jo dawa-e-ham-rangi kare

dekh kar gulshan mein phulon ke kaToron ko hina

suraKH-ru mehndi laga kar kya ho mashuq-e-habash

jab lagane baiThe tu hathon mein goron ko hina

dar pe lagwata hai gar apne shahidon ki sabil

to phir ai qatil laga tu aab-KHoron ko hina

naKHun-e-angusht-e-dast-e-mahwshan ko kar ke surKH

misl-e-aKHgar kar dikhati hai chakoron ko hina

rakh dil par dagh mat is ka KHayal-e-KHat-e-sabz

panw se milte nahin dekha hai moron ko hina

dil se tu pis jaye sar se qasd-e-pa-bosi kare

gar tere aankhon ke dekhe surKH Doron ko hina

mat mila mah-talaton se hath kyun tuDwae hai

panja-e-KHurshid se puchh un ke zoron ko hina

jun rag-e-barg-e-gul-e-ahmar bana de hai yahan

do ghaDi mein us ke har naKHun ki koron ko hina

mehr-o-mah rang-e-shafaq se surKH hain ye subh-o-sham

milte hain KHun-e-jigar dekh un sakoron ko hina

duzdi-e-rang-e-hinai jo kare hain ai 'nasir'

de hai hathon-hath bandhwa aise choron ko hina