dagh-e-sina jab mera mehr-e-daraKHshan bin gaya

dāġh-e-sīna jab mirā mehr-e-daraḳhshāñ bin gayā

sub.h-e-sādiq kī tarah chāk-e-garebāñ ban gayā

nāla-e-bulbul kī kyā tāsīr shor-añgez hai

qatra-e-shabnam se zaḳhm-e-gul namak-dāñ ban gayā

sair ai abr-e-bahārī phir tujhe dikhlā.eñge

paaT dariyā kā agar girye se dāmāñ ban gayā

shīsha-e-dil meñ hai be-Dhab us parī-rū kā ḳhayāl

daaġh us ke muñh pe kyā mohr-e-sulaimāñ ban gayā

tāle.a-e-bargashta kā kis se gilā apne karūñ

dost-dār apnā jo thā so dushman-e-jāñ ban gayā

rañg-e-dast āvaez-e-ulfat dekh kahtī hai hinā

ab to hāthoñ-hāth saudā tujh se jānāñ ban gayā

kyā hue tashrīf-farmā hazrat-e-ishq ai 'nasīr'

siina dāġhoñ se tarā rashk-e-gulistāñ ban gayā

dagh-e-sina jab mera mehr-e-daraKHshan bin gaya

subh-e-sadiq ki tarah chaak-e-gareban ban gaya

nala-e-bulbul ki kya tasir shor-angez hai

qatra-e-shabnam se zaKHm-e-gul namak-dan ban gaya

sair ai abr-e-bahaari phir tujhe dikhlaenge

paT dariya ka agar girye se daman ban gaya

shisha-e-dil mein hai be-Dhab us pari-ru ka KHayal

dagh us ke munh pe kya mohr-e-sulaiman ban gaya

talea-e-bargashta ka kis se gila apne karun

dost-dar apna jo tha so dushman-e-jaan ban gaya

rang-e-dast aawaez-e-ulfat dekh kahti hai hina

ab to hathon-hath sauda tujh se jaanan ban gaya

kya hue tashrif-farma hazrat-e-ishq ai 'nasir'

sina daghon se tara rashk-e-gulistan ban gaya