tumhaare daur mein humne saqi ajab hi daur-e-sharab dekha

tumhāre daur meñ ham ne saaqī ajab hī daur-e-sharāb dekhā

idhar to vaa.iz girā paḌā thā udhar ko zāhid ḳharāb dekhā

jo ek jhapkī meñ juz se kul ho aur ek qatra se hue dariyā

tamām a.alam meñ tū ne hamdam koī bhī misl-e-habāb dekhā

vo mast mai-ḳhvār idhar ko aayā magar ye lālach hī us ko laayā

ke mere ḳhuuñ ko sharāb-e-gul-gūñ dil-o-jigar ko kabāb dekhā

tumhāre mukhḌe ko nīche zulfoñ ke dekh kar kyā misāl kahiye

barā.e guftan magar ye kahiye ke mehr zer-e-sahāb dekhā

nahīñ hai dhokā kuchh is meñ ai dil ke hai ye dhokā tilism-e-a.alam

jo kuchh sunā thā so hai fasāna jo kuchh ke dekhā so ḳhvāb dekhā

'niyāz' aisā valī-e-bar-haq ki pīr-e-murshid ho auliyā kā

batā to ummat meñ is nabī kī koī bhī bin bū-turāb dekhā

tumhaare daur mein hum ne saqi ajab hi daur-e-sharab dekha

idhar to waiz gira paDa tha udhar ko zahid KHarab dekha

jo ek jhapki mein juz se kul ho aur ek qatra se hue dariya

tamam aalam mein tu ne hamdam koi bhi misl-e-habab dekha

wo mast mai-KHwar idhar ko aaya magar ye lalach hi us ko laya

ke mere KHun ko sharab-e-gul-gun dil-o-jigar ko kabab dekha

tumhaare mukhDe ko niche zulfon ke dekh kar kya misal kahiye

barae guftan magar ye kahiye ke mehr zer-e-sahab dekha

nahin hai dhoka kuchh is mein ai dil ke hai ye dhoka tilism-e-alam

jo kuchh suna tha so hai fasana jo kuchh ke dekha so KHwab dekha

'niyaz' aisa wali-e-bar-haq ki pir-e-murshid ho auliya ka

bata to ummat mein is nabi ki koi bhi bin bu-turab dekha