تمہارے دور میں ہم نے ساقی عجب ہی دور شراب دیکھا

تمہارے دور میں ہم نے ساقی عجب ہی دور شراب دیکھا

ادھر تو واعظ گرا پڑا تھا ادھر کو زاہد خراب دیکھا

جو ایک جھپکی میں جز سے کل ہو اور ایک قطرہ سے ہوئے دریا

تمام عالم میں تو نے ہمدم کوئی بھی مثل حباب دیکھا

وہ مست مے خوار ادھر کو آیا مگر یہ لالچ ہی اس کو لایا

کہ میرے خوں کو شراب گلگوں دل و جگر کو کباب دیکھا

تمہارے مکھڑے کو نیچے زلفوں کے دیکھ کر کیا مثال کہیے

برائے گفتن مگر یہ کہئے کہ مہر زیر سحاب دیکھا

نہیں ہے دھوکا کچھ اس میں اے دل کہ ہے یہ دھوکا طلسم عالم

جو کچھ سنا تھا سو ہے فسانہ جو کچھ کہ دیکھا سو خواب دیکھا

نیازؔ ایسا ولی برحق کہ پیر مرشد ہو اولیا کا

بتا تو امت میں اس نبی کی کوئی بھی بن بو تراب دیکھا