dasht-e-paimai se hai apni bayaban nazan

dasht-e-paimā.ī se hai apnī bayābāñ nāzāñ

apnī pā-posh se hai ḳhār-e-muġhīlāñ nāzāñ

chaak hāthoñ se hai jeb ashkoñ se tar hai dāman

jeb nāzāñ hai yahāñ aur vahāñ dāmāñ nāzāñ

bahr-e-zanjīr-e-junūñ hai ye tirī pābandī

aur mirī qaid se hai ḳhāna-e-zindāñ nāzāñ

phañs ga.e daam meñ us ke jo dil-o-jān-e-jahāñ

kyuuñ na dil-jam’ī se ho zulf-e-pareshāñ nāzāñ

tujh se to bujh na sakī ātish-e-ġham bhī ai abr

kaun se kaam pe hai tū are nādāñ nāzāñ

ik zarā hotī hai kam vahshat-e-dil rone se

hai sazā-vār jo hoñ dīda-e-giryāñ nāzāñ

rashk meñ haiñ mire aañsū se tire durr-e-yatīm

mat guhar-rezī pe ho bārish-e-naisāñ nāzāñ

haiñ dil-o-jāñ mire shāh-e-najaf par qurbāñ

ai 'niyāz' is liye haiñ mere dil-o-jāñ nāzāñ

dasht-e-paimai se hai apni bayaban nazan

apni pa-posh se hai KHar-e-mughilan nazan

chaak hathon se hai jeb ashkon se tar hai daman

jeb nazan hai yahan aur wahan daman nazan

bahr-e-zanjir-e-junun hai ye teri pabandi

aur meri qaid se hai KHana-e-zindan nazan

phans gae dam mein us ke jo dil-o-jaan-e-jahan

kyun na dil-jam’i se ho zulf-e-pareshan nazan

tujh se to bujh na saki aatish-e-gham bhi ai abr

kaun se kaam pe hai tu are nadan nazan

ek zara hoti hai kam wahshat-e-dil rone se

hai saza-war jo hon dida-e-giryan nazan

rashk mein hain mere aansu se tere durr-e-yatim

mat guhar-rezi pe ho barish-e-naisan nazan

hain dil-o-jaan mere shah-e-najaf par qurban

ai 'niyaz' is liye hain mere dil-o-jaan nazan