دشت پیمائی سے ہے اپنی بیاباں نازاں

دشت پیمائی سے ہے اپنی بیاباں نازاں

اپنی پاپوش سے ہے خار مغیلاں نازاں

چاک‌ ہاتھوں سے ہے جیب اشکوں سے تر ہے دامن

جیب نازاں ہے یہاں اور وہاں داماں نازاں

بہر زنجیر جنوں ہے یہ تری پابندی

اور مری قید سے ہے خانۂ زنداں نازاں

پھنس گئے دام میں اس کے جو دل و جان جہاں

کیوں نہ دلجمعی سے ہو زلف پریشاں نازاں

تجھ سے تو بجھ نہ سکی آتش غم بھی اے ابر

کون سے کام پہ ہے تو ارے ناداں نازاں

اک ذرا ہوتی ہے کم وحشت دل رونے سے

ہے سزاوار جو ہوں دیدۂ گریاں نازاں

رشک میں ہیں مرے آنسو سے ترے در یتیم

مت گہر ریزی پہ ہو بارش نیساں نازاں

ہیں دل و جاں مرے شاہ نجف پر قرباں

اے نیازؔ اس لیے ہیں میرے دل و جاں نازاں