mulk-e-KHuda mein yaro aabaad hain to hum hain

mulk-e-ḳhudā meñ yaaro ābād haiñ to ham haiñ

tā'mīr-e-do-jahāñ kī buniyād haiñ to ham haiñ

dekhā parkh-parakh kar āḳhir nazar chaḌhā ye

gar naqd haiñ to ham haiñ naqqād haiñ to ham haiñ

apnā hī dekhte ho tum band-o-bast yaaro

gar daad haiñ to ham haiñ faryād haiñ to ham haiñ

phailā ke dām-e-ulfat ghirte-girāte ham haiñ

gar said haiñ to ham haiñ sayyād haiñ to ham haiñ

Thahrā hai ishq-bāzī din-rāt khel apnā

gar qais haiñ to ham haiñ farhād haiñ to ham haiñ

shādī-o-ġham ye donoñ apnī hī hālateñ haiñ

dil-gīr haiñ to ham haiñ aur shaad haiñ to ham haiñ

kārī-garī kī apne ye sab musavvarī hai

tasvīr haiñ to ham haiñ bahzād haiñ to ham haiñ

hastī ke kāġhazoñ par haiñ dastaḳhat hamāre

gar fard haiñ to ham haiñ aur saad haiñ to ham haiñ

jo kuchh ke ye gaḌat hai so hai haTotī apnī

faulād haiñ to ham haiñ haddād haiñ to ham haiñ

rū-e-zamīñ ke uupar mānind-e-gard-bāde

gar ḳhaak haiñ to ham haiñ aur baad haiñ to ham haiñ

ta.alīm aur ta'allum sab hai niyāz apnā

shāgird haiñ to ham haiñ ustād haiñ to ham haiñ

mulk-e-KHuda mein yaro aabaad hain to hum hain

ta'mir-e-do-jahan ki buniyaad hain to hum hain

dekha parkh-parakh kar aaKHir nazar chaDha ye

gar naqd hain to hum hain naqqad hain to hum hain

apna hi dekhte ho tum band-o-bast yaro

gar dad hain to hum hain faryaad hain to hum hain

phaila ke dam-e-ulfat ghirte-giraate hum hain

gar said hain to hum hain sayyaad hain to hum hain

Thahra hai ishq-bazi din-raat khel apna

gar qais hain to hum hain farhad hain to hum hain

shadi-o-gham ye donon apni hi haalaten hain

dil-gir hain to hum hain aur shad hain to hum hain

kari-gari ki apne ye sab musawwari hai

taswir hain to hum hain bahzad hain to hum hain

hasti ke kaghazon par hain dastaKHat hamare

gar fard hain to hum hain aur sad hain to hum hain

jo kuchh ke ye gaDat hai so hai haToti apni

faulad hain to hum hain haddad hain to hum hain

ru-e-zamin ke upar manind-e-gard-baade

gar KHak hain to hum hain aur baad hain to hum hain

talim aur ta'allum sab hai niyaz apna

shagird hain to hum hain ustad hain to hum hain