kaif mein Dubi hui hai sajda samani meri

kaif meñ Duubī huī hai sajda sāmān.ī mirī

jhuk ga.ī ye kis ke dar par aaj peshānī mirī

mutma.in the dīda-o-dil jab hijāboñ meñ vo the

un ke jalvoñ ne baḌhā dī aur hairānī mirī

dil gayā vāraftagī-e-shauq bhī jaatī rahī

mere dil ke saath thī āshufta sāmān.ī mirī

maut kā ġham ho mujhe ye ho nahīñ saktā kabhī

maiñ to mutlaq jāvedāñ huuñ ḳhaak hai faanī mirī

maiñ amīn-e-jalva-e-husn-e-azal huuñ dahr meñ

haaye duniyā ne na kuchh bhī qadar pahchānī mirī

ek pal bhī to nahīñ ġham ke safīne ko sukūñ

kyā Dubo degī mujhe ashkoñ kī tuġhyānī mirī

dekhnā ai dil kahīñ ye un kī chaukhaT to nahīñ

kyuuñ uThāne se nahīñ uThtī hai peshānī mirī

dekhne vaale hiqārat kī nigāhoñ se na dekh

nāzish daur junūñ hai chaak dāmānī mirī

ai mazāq jaañ dahī ye aaj tuune kyā kiyā

ho ga.ī mahsūs 'qātil' ko girāñ-jānī mirī

kaif mein Dubi hui hai sajda samani meri

jhuk gai ye kis ke dar par aaj peshani meri

mutmain the dida-o-dil jab hijabon mein wo the

un ke jalwon ne baDha di aur hairani meri

dil gaya waraftagi-e-shauq bhi jati rahi

mere dil ke sath thi aashufta samani meri

maut ka gham ho mujhe ye ho nahin sakta kabhi

main to mutlaq jawedan hun KHak hai fani meri

main amin-e-jalwa-e-husn-e-azal hun dahr mein

haye duniya ne na kuchh bhi qadar pahchani meri

ek pal bhi to nahin gham ke safine ko sukun

kya Dubo degi mujhe ashkon ki tughyani meri

dekhna ai dil kahin ye un ki chaukhaT to nahin

kyun uThane se nahin uThti hai peshani meri

dekhne wale hiqarat ki nigahon se na dekh

nazish daur junun hai chaak damani meri

ai mazaq jaan dahi ye aaj tune kya kiya

ho gai mahsus 'qatil' ko giran-jaani meri