nahin yaro KHuda hargiz tumhaare sun juda haiga

nahīñ yaaro ḳhudā hargiz tumhāre suñ judā haigā

jidhar dekhe udhar mamlū sadā nūr-e-ḳhudā haigā

tumheñ dastā nahīñ lekin o hāzir aur nāzir hai

samajh kar murshid-e-kāmil suuñ dekho jā-ba-jā haigā

agar masjid meñ hai bolo to vaañ mehrāb-o-mimbar hai

agar hai dair meñ boloñ but-e-sañg be-sadā haigā

agar boloñ ki hai ham meñ qabāhat-dar-qabāhat hai

use qaid-e-ta.ayyun kar ke kahnā nāravā haigā

ahad meñ hor vāhid meñ hai vahdat barzaḳh-e-kubrā

ki shaḳhsh-o-aks meñ barzaḳh sajanjal bā-safā haigā

chirāġh-o-roshnā.ī meñ hai shola-barzaḳh-e-tābāñ

qalam hor harf meñ barzaḳh nuqta-e-mānī-numā haigā

basar meñ huā basārat meñ basīrat jayo ki barzaḳh hai

ḳhudā meñ hor hamāre meñ to barzaḳh mustafā haigā

o paayā sach ḳhudā ke ta.iiñ jo koī jān-o-dil setī

'turāb'-e-naqsh-e-na.alain-e-alī-e-murtazā haigā

nahin yaro KHuda hargiz tumhaare sun juda haiga

jidhar dekhe udhar mamlu sada nur-e-KHuda haiga

tumhein dasta nahin lekin o hazir aur nazir hai

samajh kar murshid-e-kaamil sun dekho ja-ba-ja haiga

agar masjid mein hai bolo to wan mehrab-o-mimbar hai

agar hai dair mein bolon but-e-sang be-sada haiga

agar bolon ki hai hum mein qabahat-dar-qabahat hai

use qaid-e-tayyun kar ke kahna narawa haiga

ahad mein hor wahid mein hai wahdat barzaKH-e-kubra

ki shaKHsh-o-aks mein barzaKH sajanjal ba-safa haiga

chiragh-o-roshnai mein hai shola-barzaKH-e-taban

qalam hor harf mein barzaKH nuqta-e-mani-numa haiga

basar mein hua basarat mein basirat jayo ki barzaKH hai

KHuda mein hor hamare mein to barzaKH mustafa haiga

o paya sach KHuda ke tain jo koi jaan-o-dil seti

'turab'-e-naqsh-e-nalain-e-ali-e-murtaza haiga