main nahin kahta anal-haq yar kahta hai ki bol

maiñ nahīñ kahtā anal-haq yaar kahtā hai ki bol

kyā karūñ lāchār huuñ dildār kahtā hai ki bol

be-dhaḌak ramz-e-anal-haq ai dilā mansūr-vār

ab ehī hai maslihat-bardār kahtā hai ki bol

ḳhush nahīñ ifshā-e-rāz-e-dil-rubā pesh-e-umūm

hātif-e-ġhaibī mujhe iz.hār kahtā hai ki bol

maiñ kiyā zabt-e-nafas lekin hai marzī us kī yuuñ

rāz-e-pinhāñ bā-dar-o-dīvār kahtā hai ki bol

na.iiñ athā har-chand dil meñ jo kahūñ ḳhalvat kā bhed

parda-dar ho aap o lalkār kahtā hai ki bol

dhuum suuñ fasl-e-bahār aatī hai ai mutrib chalī

mai-kade meñ bulbul-e-gulzār kahtā hai ki bol

harf jo rakhte ho mujh par yahāñ mirā kyā iḳhtiyār

jām-e-mul kī kaifiyat sarshār kahtā hai ki bol

murġh-e-dil bismil kiyā sau kushtagān-e-ishq kuuñ

aaj kā ahvāl sab ḳhuñḳhār kahtā hai ki bol

chatr sar teshe kuuñ kar farhād paayā khusravī

o ḳhabar shīrīñ ko jā kohsār kahtā hai ki bol

hāshiya vāhid nahīñ rakhtā hai lekin har nuqat

hindsa-dāñ nuqta-e-asrār kahtā hai ki bol

ai 'turāb'-e-mai-parast us kaif kī sab kaifiyat

mohtasib kuuñ sāqī-e-mai-ḳhvār kahtā hai ki bol

main nahin kahta anal-haq yar kahta hai ki bol

kya karun lachaar hun dildar kahta hai ki bol

be-dhaDak ramz-e-anal-haq ai dila mansur-war

ab ehi hai maslihat-bardar kahta hai ki bol

KHush nahin ifsha-e-raaz-e-dil-ruba pesh-e-umum

hatif-e-ghaibi mujhe izhaar kahta hai ki bol

main kiya zabt-e-nafas lekin hai marzi us ki yun

raaz-e-pinhan ba-dar-o-diwar kahta hai ki bol

nain atha har-chand dil mein jo kahun KHalwat ka bhed

parda-dar ho aap o lalkar kahta hai ki bol

dhum sun fasl-e-bahaar aati hai ai mutrib chali

mai-kade mein bulbul-e-gulzar kahta hai ki bol

harf jo rakhte ho mujh par yahan mera kya iKHtiyar

jam-e-mul ki kaifiyat sarshaar kahta hai ki bol

murgh-e-dil bismil kiya sau kushtagan-e-ishq kun

aaj ka ahwal sab KHunKHar kahta hai ki bol

chatr sar teshe kun kar farhad paya khusrawi

o KHabar shirin ko ja kohsar kahta hai ki bol

hashiya wahid nahin rakhta hai lekin har nuqat

hindsa-dan nuqta-e-asrar kahta hai ki bol

ai 'turab'-e-mai-parast us kaif ki sab kaifiyat

mohtasib kun saqi-e-mai-KHwar kahta hai ki bol