kaho mujhse mat apne jaane ki baat

kaho mujh se mat apne jaane kī baat

sunāo na phir rañj aane kī baat

ḳhudā se Daro aur bāteñ karo

baḌhāte ho kyuuñ jī ghaTāne kī baat

chale kah ke tum ham ko mat bhūlnā

bhalā ye bhī hai koī bhulāne kī baat

kabhī to rulā de hai ik baat meñ

kare hai kabhī vo hañsāne kī baat

harīfoñ kī tā'rīf mujh se na kar

samajhtā huuñ maiñ ye chhuḌāne kī baat

koī kyā samajh kar kuchh us se kahe

na maane jo apne be-gāne kī baat

na kah baiThe rahnā maiñ aatā huuñ jald

ki hai ye hamāre uThāne kī baat

chhupā.ī na mujh se ga.ī kyā kahūñ

mohabbat meñ thī jo chhupāne kī baat

'turāb' aur kyā is se ziyāda kahe

sunā de jo kuchh thī sunāne kī baat

kaho mujh se mat apne jaane ki baat

sunao na phir ranj aane ki baat

KHuda se Daro aur baaten karo

baDhate ho kyun ji ghaTane ki baat

chale kah ke tum hum ko mat bhulna

bhala ye bhi hai koi bhulane ki baat

kabhi to rula de hai ek baat mein

kare hai kabhi wo hansane ki baat

harifon ki ta'rif mujh se na kar

samajhta hun main ye chhuDane ki baat

koi kya samajh kar kuchh us se kahe

na mane jo apne be-gane ki baat

na kah baiThe rahna main aata hun jald

ki hai ye hamare uThane ki baat

chhupai na mujh se gai kya kahun

mohabbat mein thi jo chhupane ki baat

'turab' aur kya is se ziyaada kahe

suna de jo kuchh thi sunane ki baat